அணுகுண்டு வீசும் விமானத்தில் பயணித்த புடின்
ரஷ்ய ஜனாதிபதி புடின், திடீரென அணுகுண்டு வீசும் விமானம் ஒன்றில் பயணித்த செய்தி ரஷ்யர்களுக்கு உற்சாகத்தை ஏற்படுத்தியுள்ள நிலையில், அதன் பின்னணியில் பல காரணங்கள் உள்ளதாக கூறப்படுகிறது.
உக்ரைன் போர் துவங்கியதிலிருந்தே, பிரித்தானியா உட்பட, தங்களை விமர்சிக்கும் நாடுகள் மீது அணுகுண்டு வீசி காணாமல் போகச் செய்துவிடுவோம் என புடின் ஆதரவாளர்கள் மிரட்டிக்கொண்டே இருக்கிறார்கள்.
இந்நிலையில், நேற்று, திடீரென அணுகுண்டு வீசும் விமானம் ஒன்றில் ஏறி, விமானியுடன் சக விமானியாக பயணித்துள்ளார் புடின்.
அவர் பயணித்த விமானம், நேட்டோ அமைப்பால் Blackjack என அழைக்கப்படும் Tu-160 வகை அணுகுண்டு வீசும் விமானம் ஆகும்.
புடினுடைய இந்த திடீர் ஸ்டண்டுக்குப் பின்னால் பல காரணங்கள் இருப்பதாக கருதப்படுகிறது. சமீபத்தில் ரஷ்ய எதிர்க்கட்சித் தலைவரும், புடின் விமர்சகருமான அலெக்சி நவல்னி உயிரிழந்த விடயம் உலகம் முழுவதும் சர்ச்சையை உருவாக்கியுள்ளது.
அதிலிருந்து உலகின் கவனத்தைத் திசை திருப்பவும், மேற்கத்திய நாடுகளுக்கு ஒரு அணுகுண்டு மிரட்டல் செய்தியை தெரிவிக்கவும், புடின் அந்த அணுகுண்டு வீசும் விமானத்தில் பயணித்ததாக கருதப்படுகிறது.
அத்துடன், அடுத்த மாதம் ரஷ்யாவில் பொதுத்தேர்தல் நடைபெற உள்ள நிலையில், மீண்டும் ஜனாதிபதியாக ஆக தன்னை தகுதியுடையவராக காட்டிக்கொள்ளவும், உக்ரைனை விடமாட்டேன் என உக்ரைனுக்கு ஒரு செய்தி அனுப்புவதற்காகவும், புடின் இந்த திடீர் விமானப் பயணத்தை மேற்கொண்டதாக கருதப்படுகிறது.
இதற்கிடையில், புடின் அணுகுண்டு வீசும் விமானத்தில் பயணித்த விடயம் அவரது ஆதரவாளர்களை உற்சாகப்படுத்தியுள்ளது. இரண்டு நாட்களில், இரண்டாவது முறையாக, அணுகுண்டு வீசும் விமானத்தில் புடினை மீண்டும் பார்க்கும் வாய்ப்புக் கிடைத்துள்ளது என்று கூறி ரஷ்ய அரசு தொலைக்காட்சி தங்கள் மகிழ்ச்சியை வெளிப்படுத்தியுள்ளது.
போர் விமானம் ஒன்றில் புடின் பயணிப்பது, இது மூன்றாவது முறையாகும். அவர், இதற்கு முன், 2000ஆம் ஆண்டில் ஒரு முறையும், 2005இல் ஒரு முறையும் போர் விமானங்களில் பயணித்தது குறிப்பிடத்தக்கது.
