தங்கமீன்கள் பொதுவாகத் தொட்டிக்குள் நீந்துவதையே நாம் கண்டிருப்போம். ஆனால், ‘பிளப்’ (Blub) என்ற ஒரு வினோதத் தங்கமீன், தனக்கெனப் பிரத்யேகமாக உருவாக்கப்பட்ட வாகனத்தைத் தானே ஓட்டிச் சென்று கின்னஸ் உலக சாதனை படைத்துள்ளது. கணினிப் பொறியாளரான தோமஸ் டி வுல்ப் (Thomas de Wolf) என்பவரால் உருவாக்கப்பட்ட, அசைவுகளைக் கண்டறியும் (Motion-sensing) பிரத்யேக வாகனத்தின் மூலமே இந்த வினோத சாதனை நிகழ்த்தப்பட்டுள்ளது. இத்தாலியில் நடைபெற்ற ‘லோ ஷோ டெய் ரெக்கார்ட்’ (Lo Show dei Record) என்ற நிகழ்ச்சியில், கின்னஸ் நடுவர் சோபியா கிரீனாக்ரே முன்னிலையில் இந்த முயற்சி அதிகாரப்பூர்வமாக மேற்கொள்ளப்பட்டது.
இந்தத் தொழில்நுட்ப வாகனத்தின் மேல் பகுதியில் உள்ள தண்ணீர் தொட்டிக்குள் மீன் எந்தத் திசையை நோக்கி நகர்கிறதோ, அதனைக் கண்டறிந்து வாகனத்தின் சக்கரங்கள் தானாகவே இயங்கும் வகையில் வடிவமைக்கப்பட்டிருந்தது. ஒரு நிமிடத்தில் குறைந்தபட்சம் 5 மீற்றர் தூரத்தைக் கடக்க வேண்டும் என்ற இலக்கு நிர்ணயிக்கப்பட்டிருந்த நிலையில், ‘பிளப்’ வெறும் 60 வினாடிகளில் 12 மீற்றர் (40 அடி) தூரத்தைக் கடந்து அனைவரையும் வியப்பில் ஆழ்த்தியது. சக்கரங்களில் உள்ள வண்ணக் குறிகள் தரையைத் தொட்ட எண்ணிக்கையை அடிப்படையாகக் கொண்டு, மீன் கடந்த தூரம் துல்லியமாகக் கணக்கிடப்பட்டு உலக சாதனை உறுதி செய்யப்பட்டது.
இந்த வினோத முயற்சி குறித்துத் தோமஸ் டி வுல்ப் கூறுகையில், தனது அன்றாடப் பொறியியல் வேலைகள் சலிப்பானதாக இருந்ததால், தொழில்நுட்பத்தைப் பயன்படுத்தி மக்களை மகிழ்விக்கும் வகையில் எதையாவது உருவாக்க விரும்பியதாகத் தெரிவித்தார். இத்தகு நவீனத் தொழில்நுட்பத்தின் மூலம் கற்பனை செய்ய முடியாத விடயங்களையும் சாதிக்க முடியும் என்பதைக் காட்டுவதே தனது நோக்கம் எனவும் அவர் குறிப்பிட்டார். விலங்குகளின் அசைவுகளை இயந்திர ஆற்றலாக மாற்றும் இந்தத் தொழில்நுட்பம், எதிர்காலத்தில் பல்வேறு அறிவியல் ஆய்வுகளுக்குப் பயன்படும் என எதிர்பார்க்கப்படுகிறது.
