ஈரானின் அணுசக்தி மற்றும் ஏவுகணைத் திட்டங்களை முற்றிலுமாகக் கட்டுப்படுத்தும் நோக்கில், அமெரிக்க அதிபர் டொனால்ட் டிரம்ப் தலைமையிலான நிர்வாகம் அதிரடியான நிபந்தனைகளை விதித்துள்ளது. இதனை ஈரான் ஏற்கத் தவறினால் ராணுவ நடவடிக்கை எடுக்கப்படும் என எச்சரித்துள்ள டிரம்ப், உலகின் மிகப்பெரிய விமானம் தாங்கிப் போர்க்கப்பலான ‘யு.எஸ்.எஸ் ஜெரால்ட் ஆர். ஃபோர்டு’ (USS Gerald R. Ford) கப்பலை மத்திய கிழக்கு நோக்கி அனுப்பியுள்ளார். இந்த நடவடிக்கை ஈரானை நிலைகுலையச் செய்வதற்கான ஒரு நேரடி மிரட்டலாகப் பார்க்கப்படுகிறது.
அமெரிக்காவின் இந்த நகர்வுக்குப் பதிலடி கொடுத்துள்ள ஈரானின் உச்ச தலைவர் அலி காமேனி, “உலகின் வலிமையான ராணுவம் எனத் தம்பட்டம் அடிக்கும் அமெரிக்கா, விரைவில் மீள முடியாத அடியை (Slap) வாங்கக்கூடும்” என எச்சரித்துள்ளார். அமெரிக்கப் போர்க்கப்பல்களைக் கடலின் அடிப்பகுதிக்கு அனுப்பும் அதிநவீன ஆயுதங்கள் எங்களிடம் உள்ளன என்றும் அவர் ஆக்ரோஷமாகத் தெரிவித்துள்ளார். இதற்கிடையில், உலகக் கச்சா எண்ணெய் போக்குவரத்தின் முக்கியப் பாதையான ஹார்முஸ் நீர்ச்சந்தியில் (Strait of Hormuz) ஈரான் மிகப்பெரிய கடற்படை ஒத்திகையைத் தொடங்கியுள்ளது.
ஓமன் நாட்டின் முன்னிலையில் ஜெனீவாவில் நடைபெற்று வரும் பேச்சுவார்த்தையில் சில முன்னேற்றங்கள் இருப்பதாக ஈரான் கூறினாலும், அதனை அமெரிக்கா மறுத்துள்ளது. அமெரிக்க துணை அதிபர் ஜே.டி. வான்ஸ் (JD Vance) கூறுகையில், அதிபர் டிரம்ப் விதித்துள்ள ‘சிவப்பு கோடுகளை’ (Red Lines) ஈரான் இன்னும் முழுமையாக ஏற்கவில்லை எனத் தெரிவித்துள்ளார். ராஜதந்திரம் தோல்வியடைந்தால் ராணுவத் தாக்குதல் தவிர்க்க முடியாத ஒன்றாக மாறும் என அவர் சூசகமாக எச்சரித்துள்ளார்.
ஈரான் அதிபர் மசூத் பெசெஷ்கியன் அணுசக்தித் திட்டத்தை ஒருபோதும் கைவிடப் போவதில்லை என்பதில் உறுதியாக உள்ளார். இந்த மோதல் போக்கினால் சர்வதேச சந்தையில் கச்சா எண்ணெய் விலை 13 சதவீதம் வரை உயர்ந்துள்ளது. மார்ச் மாதம் நடைபெறவுள்ள மூன்றாம் கட்டப் பேச்சுவார்த்தை ஈரானின் எதிர்காலத்தையும், உலகப் பொருளாதாரத்தையும் தீர்மானிக்கும் மிக முக்கியத் தருணமாக அமையும் என எதிர்பார்க்கப்படுகிறது.
