ஈரான் மற்றும் இஸ்ரேல் நாடுகளுக்கு இடையே ஏற்பட்டுள்ள கடும் போர் பதற்றம் காரணமாக, இந்தியா முழுவதும் இன்று 444 விமானங்கள் ரத்து செய்யப்பட்டுள்ளதாக இந்திய விமான போக்குவரத்து அமைச்சகம் அறிவித்துள்ளது. அமெரிக்கா மற்றும் இஸ்ரேல் இணைந்து ஈரானின் முக்கிய பகுதிகள் மீது குண்டு மழை பொழிந்ததைத் தொடர்ந்து, நேற்று 410 விமானங்கள் ரத்து செய்யப்பட்டிருந்த நிலையில், இன்றைய சூழல் மேலும் மோசமடைந்துள்ளது.
குறிப்பாக, வளைகுடா நாடுகளில் இருந்து சென்னை வர வேண்டிய விமானங்கள் மார்ச் 3-ம் தேதி காலை 10 மணி வரை ரத்து செய்யப்பட்டுள்ளன. துபாய், பஹ்ரைன், தோஹா, சார்ஜா மற்றும் அபுதாபியில் இருந்து சென்னைக்கு வரவிருந்த மற்றும் இங்கிருந்து புறப்படவிருந்த விமான சேவைகள் நிறுத்தப்பட்டுள்ளன. இந்தத் தாக்குதலில் ஈரானின் உச்ச தலைவர் அயதுல்லா அலி காமேனி கொல்லப்பட்டதை ஈரான் அரசு உறுதி செய்துள்ளதைத் தொடர்ந்து, அந்நாட்டில் 40 நாட்கள் துக்கம் அனுசரிக்கப்பட உள்ளது.
இந்த பதற்றமான சூழலால் தங்கள் பயணத் திட்டங்களை மாற்ற வேண்டிய கட்டாயத்தில் உள்ள இந்தியாவில் உள்ள வெளிநாட்டினர், விசா நீட்டிப்பு தொடர்பான உதவிக்கு அருகிலுள்ள வெளிநாட்டினர் பிராந்திய பதிவு அலுவலகத்தைத் தொடர்பு கொள்ளுமாறு அறிவுறுத்தப்பட்டுள்ளனர். வளைகுடா பிராந்தியத்தில் நிலவும் இந்த போர் சூழல் உலகளாவிய விமான போக்குவரத்தை கடுமையாக பாதித்துள்ளது.
