மத்திய கிழக்கில் ஈரான் மற்றும் அமெரிக்க – இஸ்ரேலியக் கூட்டுப் படைகளுக்கிடையிலான போர் இன்றுடன் 4-வது வாரத்தை எட்டியுள்ளது. கடந்த மாதம் 28-ஆம் திகதி ஈரான் மீதான திடீர் தாக்குதலுடன் தொடங்கிய இந்தப் போரில், ஈரானின் அதி உயர் தலைவர் அயதுல்லா அலி கமேனி உள்ளிட்ட முக்கியத் தலைவர்கள் கொல்லப்பட்டதைத் தொடர்ந்து நிலைமை மிக மோசமடைந்துள்ளது. தலைநகர் தெஹ்ரான் உள்ளிட்ட முக்கிய நகரங்கள் நிர்மூலமாக்கப்பட்டுள்ள நிலையில், ஈரானின் வான்படை மற்றும் கடற்படைப் பிரிவுகள் முற்றாகச் செயலிழந்துவிட்டதாக அமெரிக்க ஜனாதிபதி டொனால்ட் ட்ரம்ப் அறிவித்துள்ளார். இருப்பினும், சிதைவடைந்த நிலையிலும் ஈரான் தனது நீண்ட தூர ஏவுகணை பலத்தைப் பயன்படுத்திப் பதிலடி கொடுத்து வருகிறது.
யாரும் எதிர்பாராத திருப்பமாக, சுமார் 4,000 கி.மீ. தூரம் சென்று தாக்கும் வல்லமை கொண்ட ‘கொரம்சாகர்-4’ (Khorramshahr-4) வகை ஏவுகணைகளை ஈரான் போர்க்களத்தில் இறக்கியுள்ளது. இந்தியப் பெருங்கடலில் அமைந்துள்ள அமெரிக்க – பிரித்தானிய கூட்டுப் படைத்தளமான டியாகோ கார்சியாவை (Diego Garcia) இலக்கு வைத்து நேற்று இரண்டு ஏவுகணைகள் ஏவப்பட்டன. இந்தத் தாக்குதலில் பெரும் சேதங்கள் ஏதும் ஏற்படவில்லை என்ற போதிலும், ஈரானின் ஏவுகணை வீச்சு இவ்வளவு தூரம் நீண்டிருப்பது அமெரிக்கா மற்றும் அதன் நட்பு நாடுகளுக்குப் பெரும் அதிர்ச்சியை ஏற்படுத்தியுள்ளது.
இந்த இராணுவப் பதற்றங்களுக்கு மத்தியில், உலகளாவிய எரிசக்தி விநியோகத்தின் உயிர்நாடியாகக் கருதப்படும் ஹோர்முஸ் நீரிணையை (Strait of Hormuz) ஈரான் முடக்கியுள்ளதற்கு எதிராக சர்வதேச நாடுகள் அணிதிரண்டுள்ளன. ஐக்கிய அரபு இராச்சியம், பிரித்தானியா, பிரான்ஸ், ஜேர்மனி, ஜப்பான் மற்றும் அவுஸ்திரேலியா உள்ளிட்ட 22 நாடுகள் இணைந்து ஈரானுக்குக் கண்டனம் தெரிவித்துக் கூட்டறிக்கை ஒன்றை வெளியிட்டுள்ளன. வர்த்தகக் கப்பல்கள் மீதான தாக்குதல்களை ஈரான் உடனடியாக நிறுத்த வேண்டும் என்றும், சர்வதேச கடல்சார் சட்டங்களுக்கு இணங்கி நடக்க வேண்டும் என்றும் அந்த அறிக்கையில் வலியுறுத்தப்பட்டுள்ளது.
ஹோர்முஸ் நீரிணையில் ஈரான் மேற்கொண்டு வரும் கண்ணிவெடித் தாக்குதல்கள், ட்ரோன் மற்றும் ஏவுகணைத் தாக்குதல்கள் சர்வதேசப் பொருளாதாரத்தைப் பாரியளவில் பாதிப்பதாகச் சுட்டிக்காட்டப்பட்டுள்ளது. ஐ.நா. பாதுகாப்பு சபையின் தீர்மானம் 2817-க்கு இணங்குமாறு ஈரானை வலியுறுத்தியுள்ள இந்த 22 நாடுகளின் தலைவர்கள், எண்ணெய் மற்றும் எரிவாயு ஆலைகள் உள்ளிட்ட பொதுமக்களின் உட்கட்டமைப்புகளை இலக்கு வைப்பதைக் கைவிடுமாறு கோரியுள்ளனர். இந்தப் போர் நீடித்தால் உலகளாவிய எரிபொருள் தட்டுப்பாடு மற்றும் பொருளாதார வீழ்ச்சி தவிர்க்க முடியாததாகிவிடும் எனப் பாதுகாப்பு ஆய்வாளர்கள் எச்சரிக்கின்றனர்.
