ஈரான் மீதான போரின் தாக்கம் மற்றும் உலகளாவிய எரிசக்தி சந்தை குறித்து, ‘குளோபல் எகனாமிக் அட்வைசர்ஸ்’ (Global Economic Advisors) நிறுவனத்தின் தலைமைப் பொருளாதார நிபுணர் வில்லியம் லீ (William Lee) முக்கிய எச்சரிக்கைகளை விடுத்துள்ளார். அல் ஜசீரா ஊடகத்திற்கு வழங்கிய நேர்காணலில், அமெரிக்கா தனது மூலோபாயக் கையிருப்பிலிருந்து (Strategic Petroleum Reserve) எண்ணெயை வெளியிடுவது தற்காலிகமாக விலைகளைக் கட்டுப்படுத்த உதவினாலும், அது நீண்ட காலத் தீர்வாகாது எனக் குறிப்பிட்டுள்ளார். இது சந்தையில் ஒரு ‘உளவியல் விளைவை’ மாத்திரமே ஏற்படுத்தும் என்றும், உலகச் சந்தைகளுக்குக் கிடைக்கும் எரிபொருளின் நிகர அதிகரிப்பு குறைவாகவே இருக்கும் என்பதால் தட்டுப்பாடு நீடிக்கும் என்றும் அவர் சுட்டிக்காட்டியுள்ளார்.
தற்போது எரிபொருளுக்கான தேவை சீனாவிற்கு வெளியே உள்ள ஆசிய நாடுகளிலேயே மிக அதிகமாகக் காணப்படுகின்றது. அமெரிக்காவிலிருந்து இந்த ஆசியச் சந்தைகளுக்கு எண்ணெயைக் கொண்டு சேர்ப்பதற்கு நீண்ட காலம் எடுக்கும் என்பது விநியோகச் சங்கிலியில் உள்ள ஒரு பாரிய சவாலாக வில்லியம் லீ விவரித்துள்ளார். இந்தத் தாமதமானது போர்க் காலச் சூழலில் எரிபொருள் விலையைத் தொடர்ந்து உச்சத்திலேயே வைத்திருக்கக்கூடும். அமெரிக்கா தற்போது சுமார் 415 மில்லியன் பீப்பாய் மசகு எண்ணெயைக் கையிருப்பில் வைத்திருந்தாலும், அது உலகளாவிய தேவையைப் பூர்த்தி செய்யப் போதுமானதல்ல என்பது குறிப்பிடத்தக்கது.
சீனா தனது சொந்தக் கையிருப்பிலிருந்து எண்ணெயை வழங்க முன்வராத வரை உலகளாவிய விலை உயர்வு நீடிக்கும் என லீ மேலும் தெரிவித்தார். பெய்ஜிங் அவ்வாறு செய்வதற்கான எந்தவொரு அறிகுறியும் இதுவரை தென்படவில்லை என்பது கவலைக்குரிய விடயமாகும். சீனா உலகின் மிகப்பெரிய மூலோபாய எண்ணெய் இருப்பைக் கொண்டுள்ளதாகக் கருதப்பட்டாலும், அதன் இருப்பு குறித்த அதிகாரப்பூர்வ தரவுகளைச் சீன அரசாங்கம் இரகசியமாகவே வைத்துள்ளது. இதனால், சர்வதேச எரிசக்தி சந்தையில் நிலவும் நிச்சயமற்ற தன்மை வரும் மாதங்களில் உலகப் பொருளாதாரத்தில் பெரும் தாக்கத்தை ஏற்படுத்தும் என எதிர்பார்க்கப்படுகிறது.
