உலகம் முழுவதும் பரவலாகப் பயன்படுத்தப்படும் வட்ஸ்அப் வெப் (WhatsApp Web) சேவையைப் பயன்படுத்துவதில் இன்று திடீர் தொழில்நுட்பச் சிக்கல்கள் ஏற்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன. இந்தத் தொழில்நுட்பக் கோளாறால் குறிப்பாக ஐபோன் (iPhone) பயனர்கள் அதிகளவில் பாதிக்கப்பட்டுள்ளதாகத் தெரிவிக்கப்பட்டுள்ளது.
இணையச் சேவைகளின் செயல்பாடுகளைக் கண்காணிக்கும் ‘டவுண்டெக்டர்’ (Downdetector) இணையத்தளத்திற்கு, வட்ஸ்அப் வெப் செயலிழந்துள்ளதாக ஆயிரக்கணக்கான பயனர்கள் முறைப்பாடுகளைப் பதிவு செய்துள்ளனர். கணினியுடன் தொலைபேசியை இணைப்பதில் (Pairing) சிக்கல், செய்திகள் தாமதமாகச் சென்றடைதல் அல்லது கணினியில் வட்ஸ்அப் திறக்கப்படாமை போன்ற பிரச்சினைகள் பதிவாகியுள்ளன.
இருப்பினும், இந்தச் சிக்கலானது பெரும்பாலான எண்ட்ரொய்டு (Android) பயனர்களைப் பாதிக்கவில்லை என்பது குறிப்பிடத்தக்கது. எண்ட்ரொய்டு தொலைபேசிகளைப் பயன்படுத்தி வட்ஸ்அப் வெப் சேவையைப் பயன்படுத்துபவர்களுக்குச் சேவை வழக்கம் போல் இயங்குவதாக ஊடக அறிக்கைகள் தெரிவிக்கின்றன. இது குறித்து வட்ஸ்அப் நிறுவனத்தின் தாய் நிறுவனமான மெட்டா (Meta) இன்னும் அதிகாரப்பூர்வமான விளக்கத்தை அளிக்கவில்லை.