அமெரிக்க ஜனாதிபதி டொனால்ட் ட்ரம்ப் தலைமையிலான நிர்வாகம் கடந்த ஆண்டு சர்வதேச அவசரகால பொருளாதார அதிகாரச் சட்டத்தைப் (IEEPA) பயன்படுத்தி விதித்த வரிகள் சட்டவிரோதமானது என்று அந்நாட்டு நீதிமன்றங்கள் தீர்ப்பளித்துள்ளன. இந்த அதிரடித் தீர்ப்பைத் தொடர்ந்து, இறக்குமதியாளர்களிடம் இருந்து வசூலிக்கப்பட்ட சுமார் 140 பில்லியன் டாலர் (சுமார் 11.91 லட்சம் கோடி ரூபாய்) வரியை வட்டியுடன் திருப்பிச் செலுத்துமாறு அமெரிக்க வர்த்தக நீதிமன்றம் (Court of International Trade) அதிரடி உத்தரவு பிறப்பித்துள்ளது.
முன்னதாக, பிப்ரவரி 20, 2026 அன்று அமெரிக்க உச்சநீதிமன்றம் வழங்கிய தீர்ப்பில், வரிகளை விதிக்கும் அதிகாரம் காங்கிரஸிற்கு (நாடாளுமன்றம்) மட்டுமே உண்டு என்றும், ஜனாதிபதிக்கு அத்தகைய அதிகாரம் இல்லை என்றும் குறிப்பிட்டிருந்தது. ஜனாதிபதி ட்ரம்ப் பயன்படுத்திய IEEPA சட்டம், இறக்குமதிகளை முறைப்படுத்த மட்டுமே வழிவகை செய்கிறதே தவிர, புதிய வரிகளைச் சுமத்த அனுமதிப்பதில்லை என நீதிபதிகள் சுட்டிக்காட்டினர். இந்தத் தீர்ப்பு ட்ரம்ப் நிர்வாகத்தின் பொருளாதாரக் கொள்கைகளுக்குக் கிடைத்த மிகப்பெரிய பின்னடைவாகப் பார்க்கப்படுகிறது.
உச்சநீதிமன்றத் தீர்ப்பைத் தொடர்ந்து, மார்ச் 4, 2026 அன்று வழக்கு ஒன்றை விசாரித்த வர்த்தக நீதிமன்ற நீதிபதி ரிச்சர்ட் ஈடன், சட்டவிரோதமாக வசூலிக்கப்பட்ட வரிகளை அனைத்து நிறுவனங்களுக்கும் திருப்பிச் செலுத்த உத்தரவிட்டார். வழக்கு தொடராத நிறுவனங்களுக்கும் இந்த ரீஃபண்ட் (Refund) தொகையைப் பெற்றுத்தர நடவடிக்கை எடுக்குமாறு சுங்கத் துறைக்கு அவர் அறிவுறுத்தினார். இதன் மூலம் அமெரிக்காவில் உள்ள சுமார் 3 லட்சம் இறக்குமதியாளர்கள் பலன் பெறுவார்கள் என எதிர்பார்க்கப்படுகிறது.
நீதிமன்றத் தீர்ப்பால் ஏற்பட்டுள்ள நிதி இழப்பைச் சரிசெய்ய, ஜனாதிபதி ட்ரம்ப் உடனடியாக 1974 ஆம் ஆண்டு வர்த்தகச் சட்டத்தைப் பயன்படுத்தி 10% முதல் 15% வரை புதிய “மாற்று வரிகளை” (Replacement Tariffs) அறிவித்துள்ளார். இருப்பினும், பழைய வரிகளைத் திருப்பிச் செலுத்த வேண்டிய கட்டாயம் ஏற்பட்டுள்ளதால், அமெரிக்க கருவூலத்திற்குப் பெரும் நிதி நெருக்கடி ஏற்பட்டுள்ளது. இது வரும் இடைக்காலத் தேர்தல்களில் ட்ரம்ப் நிர்வாகத்திற்கு அரசியல் ரீதியாகவும் சவால்களை ஏற்படுத்தக்கூடும் என நிபுணர்கள் கருதுகின்றனர்.
