யாழ்ப்பாணம், குருநகர் இறங்குதுறையில் இன்று (06.03.2026) காலை பயணிகளை ஏற்றிச் சென்ற படகு ஒன்று கவிழ்ந்து விபத்துக்குள்ளானதில் இருவர் உயிரிழந்துள்ளனர். பாலதீவு உற்சவத்திற்காகப் பயணிகளை ஏற்றிச் சென்ற போதே இந்தத் துரதிர்ஷ்டவசமான சம்பவம் இடம்பெற்றுள்ளது. இச்சம்பவத்தில் காயமடைந்த பலர் மீட்கப்பட்டு யாழ்ப்பாணம் போதனா வைத்தியசாலையில் அனுமதிக்கப்பட்டுள்ளனர். படகில் பயணித்தவர்களில் இருவர் இன்னும் காணாமல் போயுள்ளதாகவும், அவர்களைத் தேடும் பணிகள் கடற்படையினரால் தீவிரமாக முன்னெடுக்கப்பட்டு வருவதாகவும் பொலிஸார் தெரிவித்துள்ளனர்.
இந்த விபத்து குறித்து அதிர்ச்சியடைந்துள்ள கடற்றொழில், நீரியல் மற்றும் கடல்வளங்கள் அமைச்சர் இராமலிங்கம் சந்திரசேகர், உயிரிழந்தவர்களின் குடும்பத்தாருக்குத் தமது ஆழ்ந்த அனுதாபங்களைத் தெரிவித்துள்ளார். மேலும், துயரத்தில் இருக்கும் அந்தக் குடும்பங்களுக்கு அரசாங்கத்தின் சார்பில் வழங்கப்பட வேண்டிய அனைத்து நிவாரண உதவிகளையும் துரிதமாக வழங்குமாறு அதிகாரிகளுக்குப் பணிப்புரை விடுத்துள்ளார். விபத்தில் காயமடைந்தவர்களின் உடல்நிலை குறித்து வைத்தியசாலை அதிகாரிகளுடன் அமைச்சர் நேரடியாகத் தொடர்புகொண்டு கேட்டறிந்துள்ளார்.
விபத்துக்கான மூலக் காரணங்களைக் கண்டறிய உடனடியாக அவசர விசாரணை நடத்துமாறு கடற்படை, பொலிஸ் மற்றும் சம்பந்தப்பட்ட அனைத்துத் திணைக்களங்களுக்கும் அமைச்சர் உத்தரவிட்டுள்ளார். குறிப்பாக, “படகின் தற்போதைய நிலை கடற்பயணத்திற்குப் பாதுகாப்பானதாக இருந்ததா?, பயணிகளின் எண்ணிக்கை அனுமதிக்கப்பட்ட அளவை விட அதிகமாக இருந்ததா?, மற்றும் பயணத்தின் போது உயிர்காப்பு அங்கிகள் (Life Jackets) உள்ளிட்ட பாதுகாப்பு நடைமுறைகள் பின்பற்றப்பட்டனவா?” என்பது குறித்து விரிவான அறிக்கை ஒன்றைச் சமர்ப்பிக்குமாறு அவர் வலியுறுத்தியுள்ளார்.
மீட்புப் பணிகளில் எவ்விதத் தாமதமும் ஏற்படாத வகையில், கிடைக்கக்கூடிய அனைத்து வளங்களையும் பயன்படுத்தித் தேடுதல் நடவடிக்கைகளை முடுக்கி விடுமாறு அதிகாரிகளுக்கு அமைச்சர் அறிவுறுத்தியுள்ளார். முன்னதாக இதே கடற்பகுதியில் ஈரானியக் கப்பல் விபத்து தொடர்பான மீட்பு நடவடிக்கைகள் இடம்பெற்று வரும் சூழலில், இந்தத் தனிப்பட்ட படகு விபத்து யாழ்ப்பாண மக்களிடையே பெரும் சோகத்தை ஏற்படுத்தியுள்ளது. மீட்புப் பணிகள் குறித்த மேலதிக தகவல்கள் மற்றும் விசாரணை முடிவுகள் விரைவில் வெளியிடப்படும் என எதிர்பார்க்கப்படுகிறது.