மத்திய கிழக்கில் போர் மேகங்கள் சூழ்ந்துள்ள நிலையில், ஈரானுடன் கடந்த இரண்டு நாட்களாக மிகவும் ஆக்கபூர்வமான மற்றும் ஆழமான பேச்சுவார்த்தைகள் முன்னெடுக்கப்பட்டுள்ளதாக அமெரிக்க ஜனாதிபதி டொனால்ட் ட்ரம்ப் அதிரடியாக அறிவித்துள்ளார். இந்தப் பேச்சுவார்த்தைகளின் மூலம் பிராந்திய மோதல்களுக்கு “முழுமையான மற்றும் நிலையான தீர்வை” எட்ட முடியும் எனத் தான் நம்புவதாக அவர் குறிப்பிட்டுள்ளார். இந்த இராஜதந்திர நகர்வு, பாரிய போரை எதிர்நோக்கியிருந்த உலக நாடுகளுக்குச் சற்று நிம்மதியை ஏற்படுத்தியுள்ளது.
தற்போது ஏற்பட்டுள்ள இராஜதந்திர முன்னேற்றத்தைக் கருத்திற்கொண்டு, ஈரானின் மின் உற்பத்தி நிலையங்கள் மற்றும் முக்கிய எரிசக்தி உள்கட்டமைப்புகள் மீது நடத்தத் திட்டமிடப்பட்டிருந்த அனைத்து இராணுவத் தாக்குதல்களையும் அடுத்த ஐந்து நாட்களுக்கு உடனடியாக ஒத்திவைக்குமாறு அமெரிக்க பாதுகாப்புத் துறைக்கு (Pentagon) ஜனாதிபதி ட்ரம்ப் உத்தரவிட்டுள்ளார். ஈரானின் அணுசக்தி நிலையங்கள் மீதான தாக்குதல் திட்டங்களும் இந்தத் தற்காலிகப் போர்நிறுத்தத்தின் கீழ் வருமா என்பது குறித்து வெள்ளை மாளிகை இன்னும் தெளிவுபடுத்தவில்லை.
தனது ‘TruthSocial’ தளத்தில் இது குறித்துப் பதிவிட்டுள்ள ஜனாதிபதி ட்ரம்ப், “ஈரானுடனான ஆலோசனைகள் மிகவும் விரிவான முறையில் அமைந்துள்ளன. இந்த வாரம் முழுவதும் பேச்சுவார்த்தைகள் தொடரும். பிராந்தியத்தில் அமைதியை நிலைநாட்ட இதுவே இறுதி வாய்ப்பாக இருக்கலாம்” எனக் குறிப்பிட்டுள்ளார். தற்போது நடைபெற்று வரும் இந்த உயர்மட்டப் பேச்சுவார்த்தைகளின் வெற்றியைப் பொறுத்தே, ஐந்து நாட்களுக்குப் பின்னரான அடுத்தகட்ட இராணுவ நடவடிக்கைகள் அமையும் எனவும் அவர் எச்சரித்துள்ளார்.
மத்திய கிழக்கில் பல தசாப்தங்களாக நிலவி வரும் பகையை முடிவுக்குக் கொண்டு வருவதற்கான ஒரு வரலாற்று முக்கியத்துவம் வாய்ந்த நகர்வாக இந்த அறிவிப்பு சர்வதேச அரசியல் அரங்கில் பார்க்கப்படுகிறது. ஈரானின் அதி உயர் தலைவர் கொல்லப்பட்ட பின்னர் நிலவிய கடும் பதற்றத்தைத் தணிக்கும் நோக்கில் இந்த உரையாடல்கள் தொடங்கப்பட்டுள்ளன. எனினும், இஸ்ரேல் இந்தத் தற்காலிகப் போர்நிறுத்தத்திற்கு உடன்படுமா அல்லது தனது தாக்குதல்களைத் தொடருமா என்பது குறித்து இதுவரை உத்தியோகபூர்வ தகவல்கள் வெளியாகவில்லை.