தமிழ் மக்கள் விடுதலைப் புலிகள் கட்சியின் தலைவரும், கிழக்கு மாகாண முன்னாள் முதலமைச்சருமான சிவநேசதுரை சந்திரகாந்தன் (பிள்ளையான்) வெலிக்கடை சிறைச்சாலையில் தடுத்து வைக்கப்பட்டிருப்பதைக் கண்டித்து, அக்கட்சியின் தொண்டர்கள் இன்று (ஏப்ரல் 17, வெள்ளிக்கிழமை) மட்டக்களப்பில் அமைதியான முறையில் உண்ணாவிரதப் போராட்டத்தை ஆரம்பித்துள்ளனர்.
மட்டக்களப்பு காந்தி பூங்காவிற்கு முன்பாக இன்று காலை முதல் இந்தப் போராட்டம் முன்னெடுக்கப்பட்டு வருகின்றது. இதில் கலந்துகொண்டுள்ள கட்சியின் ஆதரவாளர்கள் மற்றும் தொண்டர்கள் தமது வாய்களைக் கறுப்புப் பட்டியால் கட்டியவாறு, அமைதியான முறையில் அமர்ந்து தமது எதிர்ப்பை வெளிப்படுத்தி வருகின்றனர். “அரசியல் பழிவாங்கல் நடவடிக்கைகளை நிறுத்து”, “பிள்ளையானை உடனடியாக விடுதலை செய்” போன்ற வாசகங்கள் அடங்கிய சுலோகங்களையும் அவர்கள் ஏந்தியுள்ளனர்.
கடந்த 2025 ஆம் ஆண்டு ஏப்ரல் 08 ஆம் திகதி, கிழக்கு பல்கலைக்கழகத்தின் முன்னாள் துணைவேந்தர் ரவீந்திரநாத் கடத்தப்பட்டு காணாமல் ஆக்கப்பட்டமை தொடர்பான விசாரணைகளுக்காகப் பிள்ளையான் குற்றப் புலனாய்வுத் திணைக்களத்தால் (CID) கைது செய்யப்பட்டார். தற்போது அவர் பயங்கரவாதத் தடைச் சட்டத்தின் (PTA) கீழ் விளக்கமறியலில் வைக்கப்பட்டுள்ளார். இவருக்கு எதிராக மட்டக்களப்பு மேல் நீதிமன்றத்தில் வழக்கு விசாரணைகள் நடைபெற்று வருகின்ற நிலையில், அவரது தரப்பால் தாக்கல் செய்யப்பட்ட அடிப்படை உரிமை மீறல் மனுக்கள் மீதான விசாரணைகளும் நிலுவையில் உள்ளன.
இதற்கிடையில், வெலிக்கடை சிறைச்சாலையில் தடுத்து வைக்கப்பட்டிருந்த சிவநேசதுரை சந்திரகாந்தன் திடீர் உடல்நலக் குறைவு காரணமாகச் சிறைச்சாலை மருத்துவமனையில் அனுமதிக்கப்பட்டுள்ளதாகத் தகவல்கள் வெளியாகியுள்ளன. அவரது உடல்நிலை தொடர்பான மேலதிக விபரங்கள் இன்னும் உத்தியோகப்பூர்வமாக அறிவிக்கப்படவில்லை என்றாலும், அவர் தற்போது மருத்துவக் கண்காணிப்பில் உள்ளதாகத் தெரிவிக்கப்படுகிறது.
மட்டக்களப்பில் நடைபெற்று வரும் இந்த உண்ணாவிரதப் போராட்டம் காரணமாக அந்தப் பகுதியில் பாதுகாப்பு பலப்படுத்தப்பட்டுள்ளது. பிள்ளையானின் விடுதலை குறித்து அரசாங்கம் உரிய நடவடிக்கை எடுக்கும் வரை தமது அமைதிப் போராட்டம் தொடரும் எனத் தமிழ் மக்கள் விடுதலைப் புலிகள் கட்சியின் பிரதிநிதிகள் தெரிவித்துள்ளனர்.
