புதிய அனுராதபுரம் மற்றும் வவுனியா ஆகிய பகுதிகளுக்கு இடையிலான மின் விநியோக கட்டமைப்பில் ஏற்பட்ட திடீர் தொழில்நுட்பக் கோளாறு காரணமாக, இன்று (05.03.2026) நாட்டின் பல பகுதிகளில் மின்சாரம் தடைப்பட்டது. இந்தத் தொழில்நுட்பக் கோளாறு காரணமாகத் தேசிய மின் கட்டமைப்புத் தொகுதியின் அதிர்வெண்ணில் (Frequency) திடீர் மாற்றம் ஏற்பட்டது. இதன் விளைவாகக் களனிதிஸ்ஸ ஒருங்கிணைந்த சுழற்சி மின் நிலையத்தின் (Kelanitissa Combined Cycle Power Plant) நீராவி விசையாழி தானாகவே செயலிழந்து, கட்டமைப்பிலிருந்து துண்டிக்கப்பட்டதாக இலங்கை மின்சார சபை (CEB) தெரிவித்துள்ளது.
இந்தச் செயலிழப்பினால் தேசிய மின் கட்டமைப்புத் தொகுதியில் சுமார் 55 மெகாவாட் மின்சாரக் கொள்ளளவு உடனடியாக இழக்கப்பட்டது. இதன் காரணமாகவே கொழும்பு மற்றும் அதனைச் சூழவுள்ள பல புறநகர்ப் பகுதிகள் உள்ளிட்ட நாட்டின் சில பகுதிகளில் திடீர் மின்தடை ஏற்பட்டது. மத்திய கிழக்கு மோதல்கள் காரணமாக நாட்டில் எரிபொருள் தட்டுப்பாடு ஏற்படக்கூடும் என்ற அச்சம் நிலவி வரும் சூழலில், இந்தத் தொழில்நுட்பக் கோளாறு பொதுமக்களிடையே தற்காலிகப் பரபரப்பை ஏற்படுத்தியது.
இருப்பினும், மின்சார சபையின் பொறியியலாளர்கள் உடனடியாகச் செயல்பட்டு நிலைமையைக் கட்டுப்பாட்டுக்குள் கொண்டுவந்தனர். மின்சாரம் தடைப்பட்ட சில நிமிடங்களிலேயே மாற்று வழிகள் மூலம் மின் விநியோகத்தை மீண்டும் வழமைக்குக் கொண்டுவர முடிந்ததாக மின்சார சபை அதிகாரிகள் உறுதிப்படுத்தியுள்ளனர். தற்போது பெரும்பாலான பகுதிகளில் மின்சாரம் முழுமையாக மீள வழங்கப்பட்டுள்ளதுடன், களனிதிஸ்ஸ மின் நிலையத்தின் விசையாழியை மீண்டும் இயக்கும் பணிகளும் நிறைவடைந்துள்ளன.
தேசிய மின் கட்டமைப்பில் இவ்வாறான சிறிய அதிர்வெண் மாற்றங்கள் ஏற்படும்போது, பாரிய சேதங்களைத் தவிர்க்க மின் நிலையங்கள் தானாகவே துண்டிக்கப்படுவது வழமையான தொழில்நுட்ப நடைமுறை என்று பொறியியலாளர்கள் விளக்கியுள்ளனர். பொதுமக்கள் தேவையற்ற அச்சம் கொள்ளத் தேவையில்லை என்றும், மின் விநியோகம் தற்போது சீராக இருப்பதாகவும் அரசாங்கம் அறிவித்துள்ளது.
