இலங்கையையும் இந்தியாவையும் இணைக்கும் வரலாற்றுச் சிறப்புமிக்க தலைமன்னார் இறங்குதுறையை (Jetty) நவீனமயமாக்குவதற்கான முதற்கட்ட மேம்பாட்டுத் திட்டம் அரசாங்கத்தினால் முன்மொழியப்பட்டுள்ளது. இத்திட்டத்தின் கீழ், 310 மீட்டர் நீளமும் 7 மீட்டர் அகலமும் கொண்ட வடக்கு இறங்குதுறை புதிதாக நிர்மாணிக்கப்படவுள்ளது. இதன் மூலம் பயணிகள் மற்றும் வாகனங்கள் பிரதான வீதியிலிருந்து கப்பல்களுக்கு எளிதாகச் செல்வதற்கான வசதிகள் ஏற்படுத்தப்படுவதுடன், இரவு நேரப் போக்குவரத்துக்காக அதிநவீன மின்விளக்கு வசதிகளும் நிறுவப்படவுள்ளன.
தற்போதுள்ள கான்கிரீட் தூண்கள் மற்றும் மரத்திலான மேடைகள் காலப்போக்கில் மிகவும் பழுதடைந்துள்ள நிலையில், துறைமுகத்தின் தற்போதைய நிலையை ஆய்வு செய்வதற்காகத் துணை அமைச்சர் ஜனித ருவான் கொடித்துவக்கு தலைமையிலான அதிகாரிகள் குழு இன்று கண்காணிப்பு விஜயம் ஒன்றை மேற்கொண்டது. 1984-ஆம் ஆண்டு யுத்தம் காரணமாக நிறுத்தப்பட்ட தலைமன்னார் – இராமேஸ்வரம் இடையிலான வர்த்தக மற்றும் பயணிகள் கப்பல் சேவையை மீண்டும் ஆரம்பிப்பதன் மூலம், இரு நாடுகளுக்கும் இடையிலான போக்குவரத்துச் செலவு பெருமளவு குறையும் என எதிர்பார்க்கப்படுகிறது.
தலைமன்னார் ரயில் நிலையத்திற்கு அருகிலேயே இந்த இறங்குதுறை அமைந்துள்ளதால், பொருட்களைக் கொண்டு செல்வதற்கும் பயணிகளுக்கும் இது மிகவும் வசதியாக அமையும். இந்தியாவிற்கு மிக அருகில் அமைந்துள்ள தலைமன்னாரின் மூலோபாய முக்கியத்துவத்தைப் பயன்படுத்தி, இலங்கை துறைமுக அதிகாரசபையின் கீழ் இப்பகுதியை ஒரு பொருளாதார மையமாக மாற்ற அதிகாரிகள் திட்டமிட்டுள்ளனர். இந்த மறுசீரமைப்புப் பணிகள் நிறைவடையும் பட்சத்தில், வட மாகாணத்தின் பொருளாதாரம் மற்றும் சுற்றுலாத்துறை புதிய வேகத்தைப் பெறும் என நம்பப்படுகிறது.
