இலங்கையிலுள்ள பிரதான வர்த்தக வங்கிகளில் அமெரிக்க டொலருக்கு நிகரான இலங்கை ரூபாயின் பெறுமதி இன்று (மார்ச் 25, 2026) சற்று அதிகரித்துள்ளது. கடந்த சில நாட்களாக நிலவிய டொலர் விலையில் ஏற்பட்டுள்ள இந்த சிறு மாற்றம் காரணமாக, விற்பனை வீதம் 317 ரூபாய் என்ற மட்டத்தில் ஸ்திரமாக காணப்படுகின்றது. டொலரின் பெறுமதி வீழ்ச்சியடைந்துள்ளமையானது இறக்குமதியாளர்கள் மற்றும் வெளிநாட்டுப் பணப்பரிமாற்றங்களில் ஈடுபடுவோரிடையே பெரும் அவதானத்தைப் பெற்றுள்ளது.
பிரதான வங்கிகளின் தரவுகளின்படி, செலான் வங்கியில் டொலரின் கொள்வனவு வீதம் 310.50 ரூபாயாகவும், விற்பனை வீதம் 316.25 ரூபாயாகவும் குறைவடைந்துள்ளது. மக்கள் வங்கியில் கொள்வனவு வீதம் 309.89 ரூபாயாகவும், விற்பனை வீதம் 316.73 ரூபாயாகவும் பதிவாகியுள்ளது. இதேவேளை, சம்பத் வங்கியில் கொள்வனவு வீதம் 310.50 ரூபாயாகவும், விற்பனை வீதம் 317 ரூபாயாகவும் வீழ்ச்சியடைந்துள்ளதுடன், ஏனைய வர்த்தக வங்கிகளிலும் இதேபோன்றதொரு விலை குறைப்பு அவதானிக்கப்பட்டுள்ளது.
கொமர்ஷல் வங்கியில் டொலரின் கொள்வனவு வீதம் 307.84 ரூபாயாகக் குறைந்துள்ளதுடன், விற்பனை வீதம் 316.25 ரூபாயாகப் பதிவாகியுள்ளது. என்.டி.பி வங்கியில் கொள்வனவு வீதம் 310.25 ரூபாயாகவும், விற்பனை வீதம் 316.75 ரூபாயாகவும் காணப்படுகின்றது. உலகளாவிய ரீதியில் ஏற்பட்டுள்ள பொருளாதார மாற்றங்கள் மற்றும் உள்நாட்டு சந்தையில் டொலருக்கான கேள்வி குறைவடைந்துள்ளமையே இந்த விலை மாற்றத்திற்குப் பிரதான காரணமாகக் கருதப்படுகின்றது.
