ஐபிஎல் 2026 தொடருக்காக கொல்கத்தா நைட் ரைடர்ஸ் (KKR) அணியால் ரூ. 9.2 கோடிக்கு ஏலத்தில் எடுக்கப்பட்ட வங்கதேச வேகப்பந்து வீச்சாளர் முஸ்தாபிசுர் ரஹ்மான், இந்தியா மற்றும் வங்கதேசம் இடையிலான தற்போதைய அரசியல் சூழல் காரணமாக அந்த அணியிலிருந்து விடுவிக்கப்பட்டார். பிசிசிஐ-யின் அறிவுறுத்தலின் பேரில் இந்த நடவடிக்கை மேற்கொள்ளப்பட்டதாகத் தெரிவிக்கப்பட்டுள்ளது. இந்த நிலையில், ஐபிஎல் வாய்ப்பை இழந்த அவர், தற்போது பாகிஸ்தான் பிரீமியர் லீக் (PSL) தொடரில் விளையாட ஒப்பந்தம் செய்துள்ளார்.
பாகிஸ்தான் பிரீமியர் லீக் தொடரின் 11-வது சீசனில், லாகூர் குவாலண்டர்ஸ் (Lahore Qalandars) அணிக்காக முஸ்தாபிசுர் ரஹ்மான் விளையாடவுள்ளார். இதற்கான ஒப்பந்தம் நேரடியாக மேற்கொள்ளப்பட்டுள்ளதாக அந்த அணி நிர்வாகம் அறிவித்துள்ளது. ஏற்கனவே 2016 மற்றும் 2018 ஆகிய ஆண்டுகளில் லாகூர் அணிக்காக இவர் விளையாடியுள்ள நிலையில், மீண்டும் அந்த அணியின் குடும்பத்தில் இணைந்திருப்பதை அணி நிர்வாகம் வரவேற்றுள்ளது.
இருப்பினும், ஐபிஎல் மற்றும் பிஎஸ்எல் தொடர்களுக்கான ஊதியங்களுக்கு இடையே பெரும் வித்தியாசம் காணப்படுகிறது. ஐபிஎல் தொடரில் ரூ. 9.2 கோடிக்கு ஒப்பந்தம் செய்யப்பட்டிருந்த முஸ்தாபிசுருக்கு, பிஎஸ்எல் தொடரில் சுமார் ரூ. 2 கோடி அளவிலான தொகையே ஊதியமாக வழங்கப்படுவதாகத் தகவல்கள் தெரிவிக்கின்றன. இது அவர் ஐபிஎல் தொடரில் பெறவிருந்த ஊதியத்தை விட சுமார் 77 சதவீதம் குறைவாகும். இருப்பினும், உயர்தரப் போட்டிகளில் விளையாடுவதைத் தொடர வேண்டும் என்ற நோக்கில் அவர் இந்த வாய்ப்பை ஏற்றுக்கொண்டுள்ளார்.
இதற்கிடையில், முஸ்தாபிசுர் ரஹ்மானுக்குப் பதிலாக, கொல்கத்தா நைட் ரைடர்ஸ் அணி ஜிம்பாப்வே அணியின் வேகப்பந்து வீச்சாளர் பிளெசிங் முசரபானியை ஒப்பந்தம் செய்துள்ளது. அவர் பிஎஸ்எல் தொடரில் இஸ்லாமாபாத் யுனைடெட் அணிக்காக ஒப்பந்தம் செய்யப்பட்டிருந்த போதிலும், ஐபிஎல் வாய்ப்பு கிடைத்ததால் பிஎஸ்எல் தொடரிலிருந்து விலகி ஐபிஎல்-க்கு மாறியுள்ளார். இது குறித்து பாகிஸ்தான் கிரிக்கெட் வாரியம் சட்ட ரீதியான நடவடிக்கைகளை எடுக்க ஆலோசித்து வருவதாகவும் தகவல்கள் வெளியாகி உள்ளன.
