ஓடுவதற்குத் தகுதியற்ற பேருந்தைச் செலுத்தி நபர் ஒருவரின் மரணத்திற்குப் பொறுப்பானவர் எனக் கண்டறியப்பட்ட இலங்கை போக்குவரத்துச் சபையின் (SLTB) சாரதி ஒருவருக்குக் கெபித்திகொல்லாவ நீதவான் நீதிமன்றம் கடூழியச் சிறைத்தண்டனை விதித்துத் தீர்ப்பளித்துள்ளது.
கெபித்திகொல்லாவ சாலையைச் சேர்ந்த குறித்த சாரதி, தொழில்நுட்பக் குறைபாடுகள் கொண்ட, ஓடுவதற்குத் தகுதியற்ற பேருந்தை ஒரு குறுகிய வீதியில் செலுத்தியுள்ளார். இதன்போது ஏற்பட்ட விபத்தில் நபர் ஒருவர் உயிரிழந்துள்ளார். இது தொடர்பாக 05 வெவ்வேறு குற்றச்சாட்டுகளின் கீழ் சாரதிக்கு எதிராக வழக்குத் தாக்கல் செய்யப்பட்டிருந்தது.
இந்த வழக்கை விசாரித்த கெபித்திகொல்லாவ நீதவான், பிரதிவாதி மீதான அனைத்துக் குற்றச்சாட்டுகளும் சந்தேகத்திற்கு இடமின்றி நிரூபிக்கப்பட்டதையடுத்து ஒரு வருடம் கடூழியச் சிறைத்தண்டனை, உயிரிழந்தவரின் குடும்பத்தினருக்கு 5 இலட்சம் ரூபா நஷ்டஈடு வழங்கவும் அரசுக்கு 15,000 ரூபா அபராதம் விதித்தும் தீர்ப்பளித்தார்.
அத்துடன் சாரதியின் சாரதி அனுமதிப்பத்திரம் (Driving License) ஓர் ஆண்டிற்கு இடைநிறுத்தப்பட்டது.
பொதுப் போக்குவரத்து வாகனங்கள் முறையாகப் பராமரிக்கப்படாமல் வீதியில் செலுத்தப்படுவதால் ஏற்படும் உயிரிழப்புகளுக்குச் சாரதிகளும் அதிகாரிகளும் சட்டரீதியாகப் பொறுப்புக் கூற வேண்டும் என்பதை இந்தத் தீர்ப்பு வலியுறுத்துவதாகச் சமூக ஆர்வலர்கள் சுட்டிக்காட்டியுள்ளனர்.
