இலங்கைக்குள் முறையான அனுமதியின்றி ட்ரோன்களை (ஆளில்லா விமானங்கள்) இயக்குவது முற்றாகத் தடை செய்யப்பட்டுள்ளதாக இலங்கை விமானப்படை இன்று (18) உத்தியோகபூர்வமாக அறிவித்துள்ளது. உள்ளூர்வாசிகள் மட்டுமன்றி, நாட்டிற்கு வருகை தரும் வெளிநாட்டுச் சுற்றுலாப் பயணிகளும் இந்த விதிமுறைகளைத் துல்லியமாகப் பின்பற்ற வேண்டும் என வலியுறுத்தப்பட்டுள்ளது. தேசிய பாதுகாப்பைக் கருத்திற் கொண்டும், வான்வெளிப் பாதுகாப்பை உறுதிப்படுத்தும் நோக்கிலும் இந்த விழிப்புணர்வு நடவடிக்கை முன்னெடுக்கப்பட்டுள்ளது.
கடந்த காலங்களில், குறிப்பாகக் கொழும்பு மற்றும் ஏனைய பிரதான நகரங்களிலுள்ள அதிஉயர் பாதுகாப்பு வலயங்களுக்குள் (High-Security Zones) சட்டவிரோதமான முறையில் ட்ரோன்களைப் பறக்கவிட்ட நபர்களுக்கு எதிராகக் கடும் சட்ட நடவடிக்கைகள் எடுக்கப்பட்டுள்ளதை விமானப்படை நினைவுபடுத்தியுள்ளது. இவ்வாறான அத்துமீறல்கள் தேசிய பாதுகாப்பிற்கு அச்சுறுத்தலாக அமைவதுடன், விமானப் போக்குவரத்துப் பாதைகளுக்கும் இடையூறுகளை விளைவிக்கக்கூடும் என்பதால், எவ்வித முன்னறிவிப்புமின்றி இயக்கப்படும் ட்ரோன்கள் மீது நடவடிக்கை எடுக்கப்படும் எனத் தெரிவிக்கப்பட்டுள்ளது.
இலங்கையில் ட்ரோன்களை இயக்க விரும்புவோர், சிவில் விமானப் போக்குவரத்து அதிகார சபை (CAASL) மற்றும் பாதுகாப்பு அமைச்சிடம் இருந்து முன்கூட்டியே உரிய அனுமதியைப் பெறுவது கட்டாயமாகும். 250 கிராமுக்கு மேற்பட்ட வணிக ரீதியான ட்ரோன்கள் அனைத்தும் பதிவு செய்யப்பட வேண்டும் என்ற விதிகள் ஏற்கனவே அமுலில் உள்ளன. ட்ரோன் இயக்குபவர்கள் தேவையற்ற சட்டச் சிக்கல்கள், அபராதங்கள் அல்லது கைது நடவடிக்கைகளுக்கு உள்ளாவதைத் தவிர்க்கும் பொருட்டு, தற்போதைய சட்ட திட்டங்களுக்கு இணங்கிச் செயற்படுமாறு கேட்டுக்கொள்ளப்பட்டுள்ளனர்.
தற்போது நிலவும் உலகளாவிய போர்ச் சூழல் மற்றும் அண்டை நாடுகளில் ட்ரோன் தாக்குதல்கள் அதிகரித்து வரும் நிலையில், இலங்கையிலும் பாதுகாப்பு பலப்படுத்தப்பட்டுள்ளது. குறிப்பாக, விமான நிலையங்கள், இராணுவ முகாம்கள் மற்றும் முக்கிய அரச கட்டடங்களுக்கு அருகில் ட்ரோன்களை இயக்குவது தண்டனைக்குரிய குற்றமாகும். ட்ரோன் தொடர்பான மேலதிக விபரங்கள் மற்றும் அனுமதி பெறும் நடைமுறைகளை விமானப்படையின் உத்தியோகபூர்வ இணையத்தளம் அல்லது சிவில் விமானப் போக்குவரத்து அதிகார சபையின் ஊடாக அறிந்துகொள்ள முடியும்.