நாட்டை சர்வாதிகாரத்தை நோக்கி அரசாங்கம் நகர்த்துகிறது” – ஊடக ஒடுக்குமுறை குறித்து சஜித் பிரேமதாச கடும் சாடல்!

தற்போதைய அரசாங்கம் ஊடக சுதந்திரத்தை நசுக்கி, கருத்துச் சுதந்திரத்திற்கு முட்டுக்கட்டை இடுவதன் மூலம் நாட்டை ஒரு சர்வாதிகார ஆட்சியை நோக்கி கொண்டு செல்ல முயற்சிப்பதாக எதிர்க்கட்சித் தலைவர் சஜித் பிரேமதாச குற்றம் சாட்டியுள்ளார்.

ஜனநாயகத்தின் முக்கிய தூணான ஊடகங்களை ஒடுக்க அரசாங்கம் காவல்துறையைக் கருவியாகப் பயன்படுத்துவதாக அவர் சாடினார். இது ஒரு ‘காவல்துறை அரசை’ உருவாக்கும் முயற்சி என அவர் குறிப்பிட்டார்.

காவல்துறையினரின் சுதந்திரமான செயல்பாடுகளில் அரசாங்கம் தலையிடுவதால், அதிகாரிகள் நடுநிலையாகப் பணியாற்ற முடியாத சூழல் ஏற்பட்டுள்ளது.

மக்கள் இந்த அரசாங்கத்திற்கு வழங்கிய ஆணை சர்வாதிகாரத்தை நிலைநாட்டவோ அல்லது மக்களின் தகவலறியும் உரிமையைப் பறிக்கவோ வழங்கப்பட்டது அல்ல என்பதை அவர் சுட்டிக்காட்டினார்.

உள்ளூராட்சி மன்றங்களின் பாதீட்டு வாக்கெடுப்புகளிலும் அரசாங்கத்தின் சர்வாதிகாரத் தலையீடுகள் ஊடுருவியுள்ளதாக அவர் தெரிவித்தார். குறிப்பாக நீர்கொழும்பு மற்றும் ஹொரண ஆகிய பகுதிகளில் இத்தகைய ஜனநாயக விரோதச் செயல்கள் இடம்பெற்றுள்ளதாக அவர் மேலும் சுட்டிக்காட்டினார்.

உண்மைத் தகவல்களை வெளிப்படுத்தும் ஊடகங்களின் உரிமையைப் பறிப்பது நாட்டின் 220 இலட்சம் மக்களின் அடிப்படை உரிமையை மீறுவதற்குச் சமமாகும் என சஜித் பிரேமதாச தனது அறிக்கையில் வலியுறுத்தியுள்ளார்.