மத்திய கிழக்கில் தற்போது நிலவும் போர் மோதல்கள் மற்றும் அவற்றால் உலகப் பொருளாதாரத்தில் ஏற்படும் தாக்கங்களைக் குறைப்பதற்கு, இந்தியப் பெருங்கடல் பிராந்திய நாடுகளின் தலைவர்களுடன் இலங்கை தொடர்ச்சியான பேச்சுவார்த்தைகளை முன்னெடுப்பது காலத்தின் கட்டாயம் என முன்னாள் ஜனாதிபதி ரணில் விக்ரமசிங்க தெரிவித்துள்ளார். தற்போதைய போர்ச் சூழல் பிராந்திய பாதுகாப்பிற்குப் பெரும் சவாலாக மாறியுள்ளதைச் சுட்டிக்காட்டிய அவர், நாடுகளுக்கிடையிலான நெருக்கமான ஒத்துழைப்பின்றி எம்மால் ஒருங்கிணைந்த பாதுகாப்புத் திட்டத்தைக் கட்டியெழுப்ப முடியாது என்று குறிப்பிட்டார்.
பிராந்தியத்தில் நிலவும் மோதல்கள் குறித்து கவலை வெளியிட்ட அவர், கடல்சார் பாதுகாப்பு, வர்த்தகம், பொருளாதார ஒருங்கிணைப்பு, மீன்பிடி, விவசாயம் மற்றும் காலநிலை மாற்றம் போன்ற விடயங்கள் குறித்து பிராந்தியத் தலைவர்கள் அடிக்கடி சந்தித்துப் பேச வேண்டும் என்று முன்மொழிந்தார். அரசியல் ரீதியான பார்வையை விரிவுபடுத்தி, இந்தியப் பெருங்கடல் பிராந்தியத்திற்கான ஒரு பொதுவான திட்டத்தை வகுப்பதன் மூலம் மட்டுமே, பிற பிராந்தியக் குழுக்களைப் போல எமக்கான ஒற்றுமையை உறுதிப்படுத்த முடியும் என்றும் அவர் சுட்டிக்காட்டினார்.
அமெரிக்கா உள்ளிட்ட வல்லரசுகளின் உலகளாவிய தலையீடுகள் குறைந்து வரும் தற்போதைய சூழல், இந்தியப் பெருங்கடல் பிராந்தியத்தின் வளர்ச்சிக்கு ஒரு முக்கிய வாய்ப்பாக அமைந்துள்ளதாக அவர் மேலும் தெரிவித்தார். இந்தச் சந்தர்ப்பத்தைப் பயன்படுத்தி, கொழும்பு பாதுகாப்பு கலந்துரையாடல் மன்றம் போன்ற அமைப்புகளைப் பலப்படுத்தி, அரசியல் ரீதியாக ஒன்றிணைந்து செயற்பட வேண்டியதன் அவசியத்தை அவர் வலியுறுத்தினார்.
தனிப்பட்ட மட்டத்திலான பேச்சுவார்த்தைகள் மற்றும் பிராந்திய நாடுகளுடனான பரஸ்பர உடன்படிக்கைகள், இலங்கையின் எதிர்காலப் பொருளாதார வளர்ச்சிக்கும் பாதுகாப்புக்கும் அடித்தளமாக அமையும் என்று அவர் நம்பிக்கை வெளியிட்டார். உலக விவகாரங்களில் பிராந்திய நாடுகளின் பங்களிப்பை அதிகரிப்பதன் மூலம், தற்போதைய நெருக்கடிகளிலிருந்து விடுபட்டு, நிலையான அபிவிருத்தியை நோக்கி நகர முடியும் என்பதே முன்னாள் ஜனாதிபதியின் கருத்தாக உள்ளது.