அனர்த்தங்களினால் பாதிக்கப்பட்ட மற்றும் வறிய மக்களுக்காக அரசாங்கத்தினால் முன்னெடுக்கப்படும் ‘Rebuilding Sri Lanka’ திட்டத்தின் கீழ், புதிய வீடுகளை நிர்மாணிக்கும் பணிகளை ஜனாதிபதி அனுர குமார திஸாநாயக்க இன்று (10) உத்தியோகப்பூர்வமாக ஆரம்பித்து வைத்தார்.
திட்டத்தின் முக்கிய அம்சங்கள்:
மக்களின் வாழ்க்கையை மீண்டும் கட்டியெழுப்புவதை நோக்கமாகக் கொண்டு, முதற்கட்டமாக இந்த வீட்டுத் திட்டம் ஆரம்பிக்கப்பட்டுள்ளது.
அனர்த்தங்களால் வீடுகளை முழுமையாக இழந்த குடும்பங்கள், மலையக மக்கள், யுத்தத்தினால் இடம்பெயர்ந்தோர் மற்றும் ஏழைக் குடும்பங்கள் இத்திட்டத்தின் கீழ் உள்வாங்கப்பட்டுள்ளனர்.
கல்னேவ, பலாகல, பலுகஸ்வெவ, இபலோகம மற்றும் திரப்பனே ஆகிய பிரதேச செயலாளர் பிரிவுகளில், மீண்டும் வசிக்கத் தகுதியானவை என உறுதிப்படுத்தப்பட்ட இடங்களில் 26 வீடுகளுக்கான இழப்பீடு மற்றும் நிர்மாணப் பணிகள் இன்று தொடங்கப்பட்டன.
நிகழ்வில் உரையாற்றிய ஜனாதிபதி, அரசாங்கத்தின் நேரடி நிதி ஒதுக்கீட்டின் கீழ் இலங்கை வரலாற்றிலேயே அதிக எண்ணிக்கையிலான வீடுகள் நிர்மாணிக்கப்படும் ஆண்டாக 2026-ஆம் ஆண்டு அமையும் எனத் தெரிவித்தார். கல்னேவ, மல்பெலிகல பகுதியில் நடைபெற்ற இந்த நிகழ்வில் அமைச்சர்கள் மற்றும் அதிகாரிகள் பலரும் கலந்துகொண்டனர்.