நபர் ஒருவரைத் தாக்கி காயப்படுத்தியமை மற்றும் கொடூரமாகச் சித்திரவதை செய்த குற்றத்திற்காகப் பொலிஸ் பரிசோதகர் ஒருவருக்கு 7 ஆண்டுகள் சிறைத் தண்டனை விதித்து மொனராகலை மேல் நீதிமன்றம் இன்று உத்தரவிட்டுள்ளது.
கடந்த 2020-ஆம் ஆண்டில், குறித்த அதிகாரி ஹம்பேகமுவ (Hambegamuwa) பொலிஸ் நிலையத்தில் கடமையாற்றிய போது, நபர் ஒருவரைத் தடுத்து வைத்து மிகக் கொடூரமான முறையில் தாக்கிச் சித்திரவதை செய்துள்ளார்.
தற்போது சியம்பலாண்டுவ பொலிஸ் நிலையத்தில் பணியாற்றி வரும் பொலிஸ் பரிசோதகரே இவ்வாறு குற்றவாளியாகக் காணப்பட்டார்.
இந்த வழக்கினை விசாரித்த மொனராகலை மேல் நீதிமன்ற நீதிபதி சிந்தக ஸ்ரீநாத் குணசேகரவினால் , குற்றவாளிக்கு 7 ஆண்டுகள் கடூழியச் சிறைத் தண்டனையும், 10,000 ரூபா அபராதம் விதிக்கப்பட்டது. இதனைச் செலுத்தத் தவறினால் மேலதிகமாக 6 மாத கால சாதாரண சிறைத் தண்டனையை அனுபவிக்க நேரிடும்.
பொலிஸ் சீருடையைப் பயன்படுத்திக் கொண்டு பொதுமக்களுக்கு எதிராக இழைக்கப்படும் வன்முறைகள் மற்றும் சித்திரவதைகளை நீதிமன்றம் ஒருபோதும் சகித்துக் கொள்ளாது என்பதை இந்தத் தீர்ப்பு மீண்டும் உறுதிப்படுத்தியுள்ளது. மனித உரிமைகளைப் பாதுகாப்பதில் நீதித்துறை கொண்டுள்ள உறுதியை இத்தீர்ப்பு பறைசாற்றுவதாகச் சட்ட வல்லுநர்கள் கருத்துத் தெரிவித்துள்ளனர்.
