அவுஸ்திரேலியாவின் சிட்னி நகரில் யூத சமூகத்தினரை இலக்கு வைத்து நடத்தப்பட்ட கொடூரமான துப்பாக்கிச் சூட்டைத் தொடர்ந்து, வெறுப்புப் பேச்சு மற்றும் தீவிரவாதக் கருத்துகளைத் தடுப்பதற்குத் தனது அரசாங்கம் மிகக் கடுமையான சட்டங்களைக் கொண்டுவரும் என பிரதமர் அந்தோணி அல்பனீஸ் (Anthony Albanese) அறிவித்துள்ளார்.
கடந்த ஞாயிற்றுக்கிழமை (டிசம்பர் 14), சிட்னியின் புகழ்பெற்ற போண்டி (Bondi) கடற்கரை பகுதியில் ஹனுக்கா (Hanukkah) பண்டிகை கொண்டாட்டத்தில் ஈடுபட்டிருந்த யூத மக்களை நோக்கித் தந்தை மற்றும் மகன் (சஜித் அக்ரம் மற்றும் நவீத் அக்ரம்) துப்பாக்கிச் சூடு நடத்தினர்.
இந்தத் தீவிரவாதத் தாக்குதலில் ஒரு குழந்தை, ஒரு ரபி (Rabbi) உட்பட மொத்தம் 15 பேர் உயிரிழந்தனர். * தாக்குதல் நடத்தியவர்களில் தந்தை சஜித் அக்ரம் பொலிஸாரால் சுட்டுக் கொல்லப்பட்டார்; மகன் நவீத் அக்ரம் கைது செய்யப்பட்டு சிகிச்சைப் பெற்று வருகிறார்.
இந்தச் சம்பவத்தைத் தொடர்ந்து பிரதமர் அல்பனீஸ் இன்று (18) பின்வரும் முக்கிய அறிவிப்புகளை வெளியிட்டுள்ளார். வெறுப்பு, சமூகப் பிரிவினை மற்றும் தீவிரவாதக் கருத்துகளைப் பரப்புபவர்களைக் குறிவைத்து புதிய சட்டங்கள் இயற்றப்படும்.
வெறுப்புப் பேச்சில் ஈடுபடும் வெளிநாட்டவர்களின் விசாக்களை உடனடியாக ரத்து செய்யவும் அல்லது விசா வழங்க மறுக்கவும் உள்துறை அமைச்சருக்குப் புதிய சட்ட ரீதியான அதிகாரங்கள் வழங்கப்படும்.
கல்வி முறையில் யூத எதிர்ப்பு (Antisemitism) போன்ற வெறுப்புணர்வுகள் ஊடுருவுவதைத் தடுக்கவும், அவற்றை எதிர்கொள்ளவும் டேவிட் கோன்ஸ்கி (David Gonski) தலைமையில் புதிய கல்விப் பணிக்குழு ஒன்று நிறுவப்படும்.
வன்முறையைத் தூண்டும் வகையில் பேசும் மதப் போதகர்கள் மற்றும் தலைவர்களுக்கு எதிரான தண்டனைகள் மற்றும் அபராதங்கள் அதிகரிக்கப்படும்.
“ஒவ்வொரு அவுஸ்திரேலிய யூதருக்கும் இந்த தேசத்தில் பாதுகாப்பாக வாழவும், பங்களிக்கவும் உரிமை உண்டு. வெறுப்புணர்வால் எமது நாட்டைத் துண்டாட நினைப்பவர்களுக்கு அவுஸ்திரேலியாவில் இடமில்லை” என பிரதமர் ஆவேசமாகத் தெரிவித்தார்.