கொழும்பு காசல் வீதி மகளிர் மருத்துவமனையில் அறிமுகப்படுத்தப்படவுள்ள முற்றுமுழுதான இலவச செயற்கை கருத்தரிப்பு (IVF) சிகிச்சைக்காக இதுவரை 2,140 தம்பதியினர் விண்ணப்பித்துள்ளதாக மருத்துவமனை நிர்வாகம் அறிவித்துள்ளது. தனியார் மருத்துவமனைகளில் பல இலட்சம் ரூபாய் செலவிட வேண்டிய இந்தச் சிகிச்சையை, அரச துறையில் இலவசமாகப் பெற்றுக்கொள்ள தம்பதியினரிடையே பெரும் வரவேற்பு கிடைத்துள்ளது.
விண்ணப்பித்துள்ளவர்களில் பெரும்பாலானோர் 30 முதல் 40 வயதுக்கு இடைப்பட்டவர்கள் என மருத்துவமனையின் பிரதிப் பணிப்பாளர் விசேட மருத்துவ நிபுணர் கமல் செனவிரத்ன தெரிவித்துள்ளார். சிகிச்சை முறை ஆரம்பிக்கப்பட்டதும், விண்ணப்பதாரர்களின் வயது மற்றும் ஆரோக்கிய நிலையை அடிப்படையாகக் கொண்டு முன்னுரிமைப் பட்டியல் தயாரிக்கப்பட்டு சிகிச்சைகள் முன்னெடுக்கப்படும்.
இலவச IVF சிகிச்சைக்கான பிரத்யேகக் கட்டடத்தின் நிர்மாணப் பணிகள் ஏற்கனவே நிறைவடைந்துள்ளன. எனினும், இதற்கான அதிநவீன ஆய்வுக்கூட (Lab) வசதிகளை அமைக்கும் பணிகள் இன்னும் முழுமையடையவில்லை. இதற்கான ஒப்பந்ததாரர்களிடம் விண்ணப்பங்கள் கோரப்பட்டுள்ளதாகவும், ஆய்வுக்கூடப் பணிகள் நிறைவடைந்ததும் சிகிச்சைகள் உத்தியோகபூர்வமாக ஆரம்பமாகும் என்றும் தெரிவிக்கப்பட்டுள்ளது.
இந்தத் திட்டம் செயல்பாட்டிற்கு வரும்போது, இலங்கையிலுள்ள அரச மருத்துவமனைகளில் இலவச IVF சிகிச்சையை வழங்கும் முதலாவது மருத்துவமனையாக கொழும்பு காசல் வீதி மகளிர் மருத்துவமனை வரலாற்றில் இடம்பிடிக்கும். இதன் மூலம் வறிய மற்றும் நடுத்தர வர்க்கத் தம்பதியினர் தங்களின் குழந்தைப்பேறு கனவை நனவாக்கிக்கொள்ள முடியும் என எதிர்பார்க்கப்படுகிறது.
