இலங்கையில் தற்போது நிலவி வரும் கடும் வறட்சியான காலநிலை காரணமாக நீர் நிலைகள் வேகமாக வற்றி வருவதைக் கருத்திற் கொண்டு, நீர் விநியோகத்தை வினைத்திறனாக முகாமைத்துவம் செய்ய தேசிய நீர் வழங்கல் மற்றும் வடிகாலமைப்புச் சபை (NWSDB) புதிய நடவடிக்கைகளை மேற்கொண்டுள்ளது. நீர் உற்பத்தி மற்றும் விநியோகத்தைக் கண்காணித்து முறையான கட்டுப்பாடுகளை விதிப்பதற்காக, சபையின் தலைவர் மற்றும் பொது முகாமையாளர் ஆகியோரால் துறைசார் அதிகாரிகளைக் கொண்ட விசேட செயற்பாட்டுக் குழுவொன்று இன்று (ஏப்ரல் 02, 2026) நியமிக்கப்பட்டுள்ளது.
இந்த விசேட குழுவானது, நீர் நிலைகளின் தற்போதைய நிலைவரம், நீர் உற்பத்தித் திறன் மற்றும் விநியோக முறைகளைத் தொடர்ச்சியாகக் கண்காணிக்கும் பணிகளில் ஈடுபடும். குறிப்பாக, இனங்காணப்பட்ட பகுதிகளில் தினசரி மற்றும் வாராந்த நீர் இருப்பை மீளாய்வு செய்து, அதன் அடிப்படையில் முகாமைத்துவ அறிக்கைகளைச் சமர்ப்பிக்கவுள்ளது. உரிய துறைகளுக்கு இடையே சிறந்த ஒருங்கிணைப்பை மேற்கொள்வதன் மூலம், பொதுமக்களுக்குப் போதுமான அளவு நீரைத் தடையின்றி விநியோகிப்பதை உறுதி செய்வதே இக்குழுவின் பிரதான நோக்கமாகும்.
எதிர்காலத்தில் தினசரி நீண்ட நேர நீர் வெட்டுக்கள் (Water Cut) ஏற்படுவதைத் தவிர்ப்பதற்காகவே இக்கட்டுப்பாட்டு நடவடிக்கைகள் எடுக்கப்பட்டுள்ளதாகச் சபை தெரிவித்துள்ளது. அனைத்து நுகர்வோரும் தங்களது அன்றாடத் தேவைகளைப் பூர்த்தி செய்யும் வகையில் நீரைப் பகிர்ந்தளிப்பதற்கும், நீர் வீண்விரயமாவதைத் தடுப்பதற்கும் தேவையான தொழில்நுட்ப ரீதியான திட்டங்கள் வகுக்கப்பட்டுள்ளன. வறட்சி நீங்கி நீர் நிலைகள் வழமைக்குத் திரும்பும் வரை இந்த விசேட செயற்பாட்டுக் குழு தொடர்ச்சியாக இயங்கும் என அறிவிக்கப்பட்டுள்ளது.
தற்போதைய இக்கட்டான சூழலில், நீரைச் சிக்கனமாகப் பயன்படுத்துமாறு பொதுமக்களிடம் தேசிய நீர் வழங்கல் மற்றும் வடிகாலமைப்புச் சபை வேண்டுகோள் விடுத்துள்ளது. வாகனங்களைக் கழுவுவதற்கும், தோட்டங்களுக்கு நீர் பாய்ச்சுவதற்கும் குடிநீரைப் பயன்படுத்துவதைத் தவிர்க்குமாறும் அறிவுறுத்தப்பட்டுள்ளது. நீர் விநியோகம் தொடர்பான முறைப்பாடுகள் அல்லது தகவல்களைச் சபையின் 1939 என்ற அவசர அழைப்பு இலக்கத்திற்குத் தொடர்பு கொண்டு தெரிவிக்க முடியும் என மேலும் குறிப்பிடப்பட்டுள்ளது.
