தெலுங்கானா மாநிலம் நிஜாமாபாத் பகுதியில் மது குடிக்கும் பழக்கத்திற்கு அடிமையான தாய் ஒருவர், மது வாங்கப் பணம் இல்லாததால் தனது 2 மாத ஆண் குழந்தையை ரூ. 2.4 லட்சத்திற்கு விற்பனை செய்த அதிர்ச்சிச் சம்பவம் வெளிச்சத்திற்கு வந்துள்ளது.
நிஜாமாபாத், எல்லம்மா குட்டா பகுதியைச் சேர்ந்த பி.ஸ்ரீனிவாஸ் என்பவரின் மனைவி லெட்சுமி. இவர்களுக்கு 2 மாத ஆண் குழந்தை ஒன்று உள்ளது. லெட்சுமிக்கு மது குடிக்கும் பழக்கம் இருந்த நிலையில், போதிய பணம் இல்லாததால் குழந்தையை விற்கத் திட்டமிட்டுள்ளார்.
ஐதராபாத்தைச் சேர்ந்த திருமணத் தரகு நிறுவனத்துடன் தொடர்புடைய ரமாதேவி மற்றும் மஞ்சுளா ஆகிய இடைத்தரகர்கள் குழந்தையை ரூ. 2 லட்சத்திற்கு வாங்குவதாகக் கூறியுள்ளனர்.
தனது கணவருக்குத் தெரியாமல் குழந்தையுடன் தலைமறைவான லெட்சுமி, இடைத்தரகர்கள் உதவியுடன் புனேவைச் சேர்ந்த தனியார் நிறுவன ஊழியரான விஷால் என்பவருக்கு ரூ. 2.4 லட்சத்திற்கு குழந்தையை விற்பனை செய்துள்ளார்.
குழந்தையைக் காணவில்லை என ஸ்ரீனிவாஸ் அளித்த புகாரின் பேரில் தீவிர விசாரணை நடத்திய பொலிஸார், லெட்சுமி மற்றும் இடைத்தரகர்களைப் பிடித்து விசாரணை நடத்தினர். இறுதியில்:
தலைமறைவாக இருந்த தாய் லெட்சுமி, இடைத்தரகர்கள் மஞ்சுளா, ரமாதேவி மற்றும் குழந்தையை வாங்கிய விஷால் ஆகிய நான்கு பேரையும் பொலிஸார் கைது செய்தனர்.
விற்கப்பட்ட 2 மாத ஆண் குழந்தை பத்திரமாக மீட்கப்பட்டது. மதுவுக்காகப் பெற்ற குழந்தையையே விற்பனை செய்யும் அளவிற்குச் சமூகம் சீரழிந்துள்ளதா எனப் பொலிஸார் இந்தச் சம்பவத்தின் போது வேதனை தெரிவித்துள்ளனர்.
