ஈரானின் புதிய உச்ச தலைவராகப் பொறுப்பேற்றுள்ள மொஜ்தபா கமேனி (Mojtaba Khamenei), தனது தந்தையின் ஆட்சிக் காலத்தில் நியமிக்கப்பட்ட உயர்மட்ட அதிகாரிகள் மற்றும் தளபதிகள் எவரும் தற்போதைக்கு மாற்றப்பட மாட்டார்கள் எனத் தெரிவித்துள்ளார். பிப்ரவரி 28 அன்று அமெரிக்க மற்றும் இஸ்ரேலிய வான்வழித் தாக்குதல்களில் தனது தந்தை அயத்துல்லா அலி கமேனி கொல்லப்பட்டதைத் தொடர்ந்து, மார்ச் 8 அன்று மொஜ்தபா புதிய தலைவராக அறிவிக்கப்பட்டார். போர்ச் சூழல் நிலவும் இந்த இக்கட்டான நேரத்தில், நிர்வாகக் கட்டமைப்பில் உடனடி மாற்றங்களைச் செய்வது தேவையற்ற குழப்பங்களை ஏற்படுத்தும் என்பதால் அவர் இந்தத் தீர்மானத்தை எடுத்துள்ளதாகக் கருதப்படுகிறது.
“எனது தந்தை வழங்கிய வழிகாட்டல்களின்படி அதிகாரிகள் தமது பணிகளைத் தொடர்வது தற்போதைய சூழலில் மிக முக்கியமானது” என ஈரானிய அரசு ஊடகங்கள் வாயிலாக அவர் வெளியிட்டுள்ள செய்தியில் குறிப்பிடப்பட்டுள்ளது. இதன் மூலம் ஈரானின் இராணுவ மற்றும் அரசியல் கட்டமைப்பில் ஒரு சீரான தன்மையையும் நிலைத்தன்மையையும் பேண அவர் முயற்சிப்பதாகத் தெரிகிறது. இருப்பினும், புதிய தலைவர் இதுவரை பொதுவெளியில் நேரடியாகத் தோன்றவில்லை. அவரது புகைப்படம் அல்லது காணொளிக் காட்சிகள் எதுவும் அதிகாரப்பூர்வமாக வெளியாகாதது, அவர் உண்மையில் எங்கே இருக்கிறார் மற்றும் அவரது உடல்நிலை எவ்வாறு உள்ளது என்ற விவாதங்களைச் சர்வதேச அளவில் தூண்டியுள்ளது.
மொஜ்தபா கமேனியின் உடல்நிலை குறித்துப் பல்வேறு முரண்பாடான தகவல்கள் உலாவுகின்றன. கடந்த மார்ச் 13 அன்று கருத்துத் தெரிவித்த அமெரிக்கப் பாதுகாப்புச் செயலாளர் பீட் ஹெக்செத், தெஹ்ரான் மீதான தாக்குதலில் மொஜ்தபா படுகாயமடைந்துள்ளதாகவும், அவரது முகம் சிதைந்திருக்கலாம் என்றும் குறிப்பிட்டிருந்தார். “அவர் காயமடைந்துள்ளார், அச்சத்தில் இருக்கிறார், மற்றும் தலைமறைவாக உள்ளார்” என ஹெக்செத் விமர்சித்திருந்தார். சில ஊடக அறிக்கைகள் அவர் தீவிர சிகிச்சை பிரிவில் (ICU) இருப்பதாகவும் அல்லது கோமா நிலையில் இருப்பதாகவும் கூடத் தகவல்களைப் பரப்பி வருகின்றன.
எவ்வாறாயினும், இந்தத் தகவல்களை ஈரானியத் தரப்பு திட்டவட்டமாக மறுத்துள்ளது. ஈரானிய ஜனாதிபதி மசூத் பெசெஷ்கியனின் மகனான யூசுப் பெசெஷ்கியன், மார்ச் 11 அன்று வெளியிட்ட பதிவில், புதிய உச்ச தலைவர் இறை அருளால் பாதுகாப்பாகவும் எவ்விதப் பாதிப்புமின்றியும் இருப்பதாகத் தெரிவித்துள்ளார். அவர் பாதுகாப்பு காரணங்களுக்காகவே மறைவிடத்தில் இருப்பதாகவும், விரைவில் நாட்டு மக்களுக்கு உரையாற்றுவார் என்றும் ஈரானிய அதிகாரிகள் கூறி வருகின்றனர். எனினும், மார்ச் 12 அன்று அவரது உரை அரச தொலைக்காட்சியில் வாசிக்கப்பட்ட போதும் அவர் திரையில் தோன்றாதமை, அவர் உண்மையில் காயமடைந்துள்ளாரா என்ற சந்தேகத்தை உலக நாடுகளிடையே நீடிக்கச் செய்துள்ளது.
