தமிழக சட்டமன்றத் தேர்தல் முடிவுகள் வெளியானதைத் தொடர்ந்து, தி.மு.க. தலைவர் மு.க.ஸ்டாலின் வாக்காளர்களுக்கு நன்றி தெரிவித்து உருக்கமான அறிக்கை ஒன்றை வெளியிட்டுள்ளார். அதில், தி.மு.க. தலைமையிலான மதச்சார்பற்ற முற்போக்குக் கூட்டணி வேட்பாளர்களுக்கு வாக்களித்த 1.54 கோடிக்கும் அதிகமான தமிழ்நாட்டு மக்கள் அனைவருக்கும் தனது மனமார்ந்த நன்றியைத் தெரிவித்துக் கொள்வதாகக் குறிப்பிட்டுள்ளார். மக்களின் ஒவ்வொரு வாக்கையும் ஒரு விலைமதிப்பற்ற நம்பிக்கையாகத் தான் கருதுவதாகவும் அவர் அந்த அறிக்கையில் கூறியுள்ளார்.
தேர்தல் புள்ளிவிவரங்களின்படி, தி.மு.க. கூட்டணி 1 கோடியே 54 இலட்சத்து 82 ஆயிரத்து 782 வாக்குகளைப் பெற்றுள்ளது. வெற்றி பெற்ற கட்சிக்கும் தி.மு.க.வுக்குமான வாக்கு சதவீத வேறுபாடு வெறும் 3.52 சதவீதம் மட்டுமே என்பதைச் சுட்டிக்காட்டியுள்ள அவர், மக்கள் தங்கள் மீது வைத்துள்ள நம்பிக்கை இப்போதும் வலிமையாகவே இருப்பதை இது காட்டுவதாகத் தெரிவித்தார். மேலும், வெற்றி பெற்ற வேட்பாளர்கள் அனைவரும் உடனடியாகத் தத்தமது தொகுதி மக்களை நேரில் சந்தித்து நன்றி தெரிவிக்க வேண்டும் என்றும் அவர் அறிவுறுத்தியுள்ளார்.
அரசியல் பொதுவாழ்வில் வெற்றியையும் தோல்வியையும் சமமாகக் கருதுபவர்கள் கழக உடன்பிறப்புகள் என்று குறிப்பிட்ட மு.க.ஸ்டாலின், தி.மு.க. ஏற்கனவே ஆறு முறை ஆட்சியில் இருந்த பேரியக்கம் என்றும், கொள்கைப் பயணத்தில் தளர்வின்றித் தொடர்வதே முக்கியம் என்றும் வலியுறுத்தினார். “உங்களால் உருவாக்கப்பட்ட எனக்கு நீங்கள் உடனிருக்கும் வரை எதைப் பற்றியும் கவலையில்லை” எனத் தொண்டர்களுக்குத் தனது நன்றியைப் புலப்படுத்திய அவர், தந்தை பெரியார், அண்ணா மற்றும் கலைஞர் காட்டிய பாதையில் இனம், மொழி காக்கும் பயணம் தொடரும் என உறுதி அளித்தார்.
ஆளும் கட்சியாக இருந்தபோது பல்வேறு மக்கள் நலத் திட்டங்களைத் தீட்டியதைப் போலவே, தற்போது ஒரு வலிமையான எதிர்க்கட்சியாக இருந்து மக்களுக்கான அரசியலைத் தொடரப் போவதாக அவர் அறிவித்துள்ளார். மக்களின் கோரிக்கைகளுக்காகவும், உரிமைகளுக்காகவும் சட்டமன்றத்திலும் மக்கள் மன்றத்திலும் தி.மு.க. தொடர்ந்து போராடும் என்றும், நூறாண்டு கண்ட திராவிடப் பேரியக்கத்தின் கொள்கைகளை நிலைநாட்ட மீண்டும் வெல்வோம் என்ற நம்பிக்கையையும் அவர் தனது அறிக்கையின் வாயிலாக வெளிப்படுத்தியுள்ளார்.