நாட்டில் நிலவும் எரிபொருள் நெருக்கடிக்கு மத்தியில், எரிசக்தியைச் சிக்கனமாகப் பயன்படுத்தும் நோக்கில் அரச அலுவலகங்களை முன்னெடுத்துச் செல்வது தொடர்பான புதிய சுற்றுநிருபத்தைப் பொதுநிர்வாக, உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சு வெளியிட்டுள்ளது. இந்த அறிவித்தல் அனைத்து அமைச்சின் செயலாளர்கள், திணைக்களத் தலைவர்கள் மற்றும் அரச கூட்டுத்தாபனங்களின் தலைவர்களுக்கு அனுப்பி வைக்கப்பட்டுள்ளது.
புதிய வழிகாட்டல்களின்படி, ஒவ்வொரு வாரமும் புதன்கிழமை வழங்கப்பட்டுள்ள விடுமுறை காரணமாக, அன்றைய தினத்திற்குரிய அத்தியாவசியப் பணிகளை வாரத்தின் செவ்வாய்க்கிழமைக்கு மாற்றியமைத்துக் கொள்ள வேண்டும். இருப்பினும், நிறுவனத் தலைவர்கள் அவசியமெனக் கருதினால் புதன்கிழமைகளில் அதிகாரிகளைச் சேவைக்கு அழைக்க முடியும். ஆனால், அவ்வாறு அழைக்கப்படும் அதிகாரிகளுக்கு மேலதிக நேரக் கொடுப்பனவு, விடுமுறை தின சம்பளம் அல்லது பதில் விடுமுறை வழங்கப்பட மாட்டாது என்பது குறிப்பிடத்தக்கது.
மேலும், புதன்கிழமைகளில் மூடப்படும் அலுவலகங்களின் அதிகாரிகள், அந்த வாரத்தின் சனி, ஞாயிறு அல்லது பொது விடுமுறை தினங்களில் மேலதிக நேரக் கொடுப்பனவு அல்லது பதில் விடுமுறை அடிப்படையில் வழமையாகச் சேவையில் ஈடுபடுத்தப்படக் கூடாது என வலியுறுத்தப்பட்டுள்ளது. இது தேவையற்ற செலவினங்களைக் குறைக்கவும், எரிசக்தி சேமிப்பை உறுதிப்படுத்தவும் எடுக்கப்பட்ட நடவடிக்கையாகும்.
இருப்பினும், சேவையின் அவசரத் தேவை கருதி விடுமுறை தினங்களில் அதிகாரிகளை அழைக்க வேண்டிய அவசியம் ஏற்பட்டால், சம்பந்தப்பட்ட அமைச்சின் செயலாளர் அல்லது திணைக்களத் தலைவரின் முறையான அனுமதியுடன் அவர்களைச் சேவைக்கு அழைக்கத் தடையில்லை. அத்தகைய சந்தர்ப்பங்களில் மட்டும், சம்பந்தப்பட்ட அதிகாரிகளுக்குரிய மேலதிக நேரக் கொடுப்பனவு அல்லது பதில் விடுமுறையைப் பெற்றுக்கொள்ள அனுமதி வழங்கப்பட்டுள்ளது.