மருத்துவர்களுக்குச் சனிக்கிழமை விடுமுறை? – அரசாங்கத்திற்கு மருத்துவ நிபுணர்கள் சங்கம் அவசர கோரிக்கை!

நாட்டில் நிலவி வரும் கடுமையான எரிபொருள் நெருக்கடி மற்றும் அதீத விலை உயர்வு காரணமாகச் சுகாதாரத் துறையினர் பெரும் பாதிப்புக்குள்ளாகியுள்ள நிலையில், சனிக்கிழமைகளை மருத்துவர்களுக்கான உத்தியோகபூர்வ விடுமுறை தினமாக அறிவிக்குமாறு மருத்துவ நிபுணர்கள் சங்கம் (AMS) அரசாங்கத்திடம் அவசர கோரிக்கை விடுத்துள்ளது. தற்போதைய பொருளாதாரச் சூழலில் நீண்ட தூரம் பயணித்து கடமைகளை முன்னெடுப்பது மருத்துவ நிபுணர்களுக்குப் பெரும் நிதிச் சுமையாக மாறியுள்ளதாக அச்சங்கம் சுட்டிக்காட்டியுள்ளது.

குறிப்பாக வெளிமாவட்ட மருத்துவமனைகளில் பணியாற்றும் மருத்துவ நிபுணர்கள், ஒரு நாளைக்கு பலமுறை நீண்ட தூரம் பயணிக்க வேண்டியுள்ள நிலையில், தற்போதைய எரிபொருள் தட்டுப்பாடு மற்றும் விலையேற்றத்தால் அவர்களது போக்குவரத்துச் செலவுகள் கட்டுப்படியாகாத நிலையை எட்டியுள்ளன. ஏனைய அரச துறை ஊழியர்களுக்கு எரிபொருள் விலை உயர்வுக்கு ஏற்ப கொடுப்பனவுகள் வழங்கப்படுகின்ற போதிலும், மருத்துவ நிபுணர்களுக்குப் போதுமான இழப்பீடுகள் வழங்கப்படுவதில்லை என அச்சங்கம் அதிருப்தி வெளியிட்டுள்ளது. இதனால், வாராந்த வேலை நாட்களை மீளமைத்துச் சனிக்கிழமையை விடுமுறை தினமாக அறிவிப்பது காலத்தின் கட்டாயம் என வலியுறுத்தப்பட்டுள்ளது.

தூர பிரதேசங்கள் மற்றும் பின்தங்கிய பகுதிகளில் பணியாற்றும் மருத்துவர்கள் மத்தியில் நிலவும் இந்த அதிருப்திக்கு உடனடித் தீர்வு காணப்படாவிட்டால், விசேட மருத்துவ சேவைகள் கடுமையாகப் பாதிக்கப்படக்கூடும் என எச்சரிக்கை விடுக்கப்பட்டுள்ளது. இந்த நெருக்கடி குறித்து அதிகாரிகளுடன் அவசர கலந்துரையாடலை மேற்கொள்ளத் தயாராக இருப்பதாகத் தெரிவித்துள்ள மருத்துவ நிபுணர்கள் சங்கம், பொதுமக்களுக்கான சுகாதார சேவைகளைத் தடையின்றி உறுதிப்படுத்த இந்த நடவடிக்கை மிக அவசியமானது என்றும் தனது அறிக்கையில் மேலும் குறிப்பிட்டுள்ளது.