தெஹிவளை, குவார்ட்ஸ் (Quartz) விளையாட்டு மைதானத்திற்கு அருகில் கடந்த 6 ஆம் திகதி இடம்பெற்ற துப்பாக்கிச் சூட்டுச் சம்பவம் தொடர்பில், தேடப்பட்டு வந்த பிரதான சந்தேக நபர் கைது செய்யப்பட்டுள்ளதாக பொலிஸார் தெரிவித்துள்ளனர்.
கைது செய்யப்பட்டவர் களுபோவில, வனரத்தன வீதியைச் சேர்ந்த 52 வயதுடைய ஒருவராவார். கடந்த 6 ஆம் திகதி முன்னெடுக்கப்பட்ட இந்தத் துப்பாக்கிச் சூட்டில் ஒருவர் உயிரிழந்ததுடன், மற்றொருவர் படுகாயமடைந்திருந்தார்.
சந்தேக நபரிடம் மேற்கொள்ளப்பட்ட தீவிர விசாரணைகளைத் தொடர்ந்து, அவர் வழங்கிய தகவலின் அடிப்படையில் கொலைக்குப் பயன்படுத்தப்பட்ட ஆயுதங்கள் மீட்கப்பட்டுள்ளன:
பெல்லன்வில பூங்கா பகுதிக்கு அருகில் மண்ணுக்குள் புதைக்கப்பட்டிருந்த நிலையில், உள்ளூரில் தயாரிக்கப்பட்ட 16 போரா (16-Bore) ரகத் துப்பாக்கி ஒன்று மீட்கப்பட்டது.
அத்துடன் அந்தத் துப்பாக்கிக்குப் பயன்படுத்தப்படும் 4 தோட்டாக்களை பொலிஸார் கைப்பற்றியுள்ளனர்.
இந்தக் கொலைச் சம்பவத்திற்கான பின்னணி மற்றும் இதனுடன் தொடர்புடைய ஏனைய நபர்கள் குறித்து தெஹிவளை பொலிஸார் மேலதிக விசாரணைகளை முன்னெடுத்து வருகின்றனர்.