மத்திய கிழக்கு நாடுகளில் நிலவி வரும் போர் பதற்றம் மற்றும் ஹோர்முஸ் நீரிணை (Strait of Hormuz) தற்காலிகமாக மூடப்பட்டதன் காரணமாக, டுபாய் துறைமுகத்தைச் சென்றடைய வேண்டிய லம்போகினி (Lamborghini), ரோல்ஸ் ரோய்ஸ் (Rolls-Royce) மற்றும் பெராரி (Ferrari) உள்ளிட்ட சுமார் 50 விலையுயர்ந்த பழைய சொகுசு வாகனங்கள் சீனாவிலும் இலங்கையிலும் தரையிறக்கப்பட்டுள்ளன. டுபாயில் உள்ள கொள்வனவாளர்கள் இந்த வாகனங்களுக்காகக் காத்திருந்த நிலையில், பாதுகாப்பு காரணங்களுக்காகக் கப்பல் நிறுவனங்கள் இந்த அதிரடி முடிவை எடுத்துள்ளன. இதனால் பில்லியன் கணக்கான ரூபாய் பெறுமதியான சொகுசு வாகனங்கள் தற்போது பாதுகாப்பான இடைத்தங்கல் நிலையங்களில் நிறுத்தி வைக்கப்பட்டுள்ளன.
மற்றொரு சம்பவத்தில், டுபாய்க்குச் செல்ல வேண்டிய சரக்குக் கப்பல்கள் திடீரெனத் திசைதிருப்பப்பட்டதால் இலங்கையின் துறைமுகங்களில் கடும் நெரிசல் ஏற்பட்டுள்ளது. இதன் விளைவாக, ஜப்பான் மற்றும் தென்கொரியாவிலிருந்து 500-க்கும் மேற்பட்ட பழைய சிற்றூந்துகளை ஏற்றி வந்த கப்பல் ஒன்று கடலிலேயே நீண்ட நாட்களாகக் காத்திருக்க வேண்டிய சூழல் உருவானது. இறுதியில், சுமார் 10 நாட்கள் தாமதத்திற்குப் பிறகு அந்த வாகனங்கள் ஹம்பாந்தோட்டை துறைமுகத்தில் இறக்கி வைக்கப்பட்டன. சரக்குகள் இவ்வாறு திசைதிருப்பப்படுவதால், எரிபொருள் மற்றும் சேமிப்புக் கிடங்குகளுக்கான மேலதிக செலவுகள் அதிகரித்து வருவதாக ஏற்றுமதியாளர்கள் கவலை தெரிவித்துள்ளனர்.
ஜப்பான் மற்றும் தென்கொரியாவிலிருந்து வரும் பழைய வாகனங்களுக்கு மத்திய கிழக்கு நாடுகள் ஒரு முக்கிய சந்தையாகத் திகழும் வேளையில், தற்போதைய நிச்சயமற்ற நிலை வர்த்தகத்தைப் பெரிதும் பாதித்துள்ளது. இதனால் பல சர்வதேச நிறுவனங்கள் தங்கள் கப்பல்களை இலங்கை உள்ளிட்ட தெற்காசியப் பகுதிகளில் நிறுத்தி வைத்து, நிலைமையைக் கூர்ந்து அவதானிக்கும் ‘காத்திருந்து கவனிக்கும்’ (Wait-and-Hold) உத்தியைக் கையாண்டு வருகின்றன. மத்திய கிழக்கில் அமைதி திரும்பும் வரை இத்தகைய போக்குவரத்துத் தடைகள் மற்றும் மேலதிக செலவுகள் தொடரும் என எதிர்பார்க்கப்படுகின்றது.
