தமிழக வெற்றிக் கழகத்தின் தலைவர் விஜய், 2026 சட்டமன்றத் தேர்தலில் 234 தொகுதிகளிலும் தனித்துப் போட்டியிடும் நிலையில், தனது வேட்பாளர்களை ஆதரித்துத் தீவிரப் பிரசாரப் பயணத்தை மேற்கொண்டு வருகிறார். சென்னை பெரம்பூர், திருச்சி மற்றும் புதுச்சேரி ஆகிய இடங்களில் தனது முதற்கட்டப் பிரசாரத்தை வெற்றிகரமாக முடித்துள்ள அவர், தற்போது தென்மாவட்டங்களைக் குறிவைத்துத் தனது அடுத்தகட்ட நகர்வைத் தொடங்கியுள்ளார். வரும் ஏப்ரல் 8-ஆம் தேதி திருநெல்வேலியில் விஜய் பிரம்மாண்ட பிரசாரம் மேற்கொள்ள உள்ளதாகத் தகவல்கள் வெளியாகியுள்ளன.
இந்த முக்கியமான கூட்டத்திற்காக நெல்லை – குமரி நான்கு வழிச்சாலையில் கங்கை கொண்டான் சிப்காட் பகுதி, பாளை ராஜகோபாலபுரம் மற்றும் சுத்தமல்லி மேற்கு புறவழிச்சாலை ஆகிய மூன்று இடங்கள் முதற்கட்டமாகப் பரிசீலிக்கப்பட்டு வருகின்றன. குறைந்தது 30 ஏக்கர் பரப்பளவு கொண்ட இடத்தையே தேர்வு செய்ய வேண்டும் என்று கட்சித் தலைமை உத்தரவிட்டுள்ளதால், லட்சக்கணக்கான தொண்டர்கள் திரள்வார்கள் என எதிர்பார்க்கப்படுகிறது. இந்தப் பிரம்மாண்ட பொதுக்கூட்டத்தில் மதுரைக்குத் தெற்கே உள்ள அனைத்து மாவட்ட வேட்பாளர்களையும் விஜய் ஒரே மேடையில் அறிமுகம் செய்து வைக்க வாய்ப்புள்ளதாகக் கூறப்படுகிறது.
பாதுகாப்பு மற்றும் அனுமதி குறித்துக் காவல்துறை வட்டாரங்கள் கூறுகையில், தலைவர்கள் பிரசாரத்திற்கு வருவதற்கு முன்னதாக மாவட்ட தேர்தல் நடத்தும் அலுவலரிடம் முறையான அனுமதி கோர வேண்டும் என்று தெரிவித்துள்ளனர். இதுவரை தவெக தரப்பிலிருந்து அதிகாரப்பூர்வமாக அனுமதி கோரப்படவில்லை என்றாலும், இன்று அல்லது நாளை அதற்கான விண்ணப்பங்கள் சமர்ப்பிக்கப்படும் எனத் தெரிகிறது. விஜய்யின் வருகையை முன்னிட்டு தென்மாவட்டங்களில் பாதுகாப்பு ஏற்பாடுகள் இப்போதே பலப்படுத்தப்பட்டு வருகின்றன.
விஜய்யின் இந்தத் தென்மாவட்ட வருகை அறிவிப்பு, திருநெல்வேலி, கன்னியாகுமரி, தூத்துக்குடி உள்ளிட்ட மாவட்டங்களில் உள்ள தவெக தொண்டர்களிடையே பெரும் உற்சாகத்தை ஏற்படுத்தியுள்ளது. சினிமாவில் இருந்து அரசியலுக்கு முழுமையாகத் தடம் பதித்துள்ள விஜய்யின் ஒவ்வொரு அசைவும் மற்ற அரசியல் கட்சிகளிடையே உன்னிப்பாகக் கவனிக்கப்பட்டு வருகிறது. குறிப்பாகத் தென்மாவட்டங்களில் நிலவும் சாதிய மற்றும் அரசியல் சமன்பாடுகளை விஜய் தனது பிரசாரத்தின் மூலம் எப்படி மாற்றப்போகிறார் என்பதே அரசியல் விமர்சகர்களின் எதிர்பார்ப்பாக உள்ளது.
