தமிழ் சினிமா ரசிகர்கள் நீண்ட நாட்களாகக் காத்திருந்த கனவு கூட்டணி ஒன்று 36 வருடங்களுக்குப் பிறகு திரும்பி வந்திருக்கின்றது. அதுவேறு யாரும் இல்லை, உலக நாயகன் கமல்ஹாசன் மற்றும் மணிரத்தினம் தான். இவர்கள் இருவரும் இணைந்து உருவாக்கியுள்ள ‘தக் லைஃப்’ (Thug Life) திரைப்படம் தற்போது இசை வெளியீடுகளுக்கு மத்தியில் பெரும் எதிர்பார்ப்பையும், வரவேற்பையும் பெற்றுவருகின்றது.
ராஜ்கமல் ஃபிலிம் இன்டர்நேஷனல் மற்றும் மணிரத்தினத்தின் மெட்ராஸ் டாக்கீஸ் இணைந்து தயாரித்துள்ள ‘தக் லைஃப்’ திரைப்படம், மிகுந்த பட்ஜெட் மற்றும் பல மொழிகளில் ரிலீஸ் என இந்திய திரையுலகத்தில் பேசப்படும் மிக முக்கியமான படமாக மாறியுள்ளது.
இந்தப் படத்தில் கமல்ஹாசன் தவிர, சிம்பு, த்ரிஷா, ஜோஜு ஜார்ஜ், ஐஸ்வர்யா லட்சுமி உள்ளிட்ட பலர் முக்கிய கதாப்பாத்திரங்களில் நடித்துள்ளனர். படத்தின் முதலாவது பாடலாக வெளியான ‘ஜிங்குச்சா’, இசை ரசிகர்கள் மத்தியில் மெகா ஹிட் ஆனது. ஏ.ஆர். ரகுமானின் நவீன இசையில் வெளியான இந்தப் பாடலை யூடியூபில் பல கோடி பார்வையாளர்கள் பார்த்தனர்.
‘தக் லைப்’ படத்தின் இரண்டாவது பாடலாக வெளிவந்த ‘சுகர் பேபி’ பாடல், ‘ஜிங்குச்சா’-வுடன் ஒப்பிடும் போது மென்மையான காதல் கலந்த பாடலாக அமைந்திருந்தது. இப்போது மூன்றாவது பாடலான ‘விண்வெளி நாயகா’ என்ற பாடல், இசையின் அழுத்தத்தாலும், குரல்களின் தனித்துவத்தாலும் ரசிகர்களை மறுபடியும் கவர்ந்துள்ளது. இப்பாடல் வெளியான சில மணிநேரங்களிலேயே அதிகளவான பார்வையாளர்களைக் கவர்ந்துள்ளது.