திருக்கோவில் பிரதேசத்தில் முச்சக்கர வண்டியில் பயணித்த நியூசிலாந்துப் பிரஜை ஒருவருக்குப் பாலியல் தொந்தரவு கொடுத்த குற்றச்சாட்டுத் தொடர்பில் சந்தேகநபர் ஒருவரைப் பொலிஸார் இன்று (நவ 16) மாலை கைது செய்துள்ளனர்.
முச்சக்கர வண்டியை ஓட்டிச் செல்லும் வெளிநாட்டுப் பெண் ஒருவருக்கு ஒருவர் தனது பாலியல் உறுப்பைக் காட்டும் அநாகரிகச் செயலைக் காட்டும் வீடியோ ஒன்று அண்மைக்காலமாகச் சமூக ஊடகங்களில் பரவி வந்தது. இந்தச் சம்பவத்தைச் சந்தித்த 24 வயதுடைய நியூசிலாந்துப் பிரஜை ஒருவரால் நேற்று (நவம்பர் 15) பிற்பகல் சுற்றுலாப் பொலிஸ் பிரிவுக்கு மின்னஞ்சல் மூலம் முறைப்பாடு செய்யப்பட்டது.
விசாரணைகளின்போது, கடந்த செப்டெம்பர் மாதம் இலங்கைக்கு வந்த குறித்த யுவதி, ஒக்டோபர் 25ஆம் திகதி அறுகம்பையில் இருந்து பாசிக்குடாவிற்கு முச்சக்கர வண்டியில் பயணித்துக் கொண்டிருந்தபோது, திருக்கோவில் பிரதேசத்தில் இந்த நபரைச் சந்தித்துப் பேசியுள்ளார். அந்தச் சமயத்தில்தான் குறித்த நபர் இந்த அநாகரிகச் செயலைச் செய்துள்ளார் என்பது தெரியவந்துள்ளது.
திருக்கோவில் பொலிஸார் மற்றும் பொத்துவில் பொலிஸார் இணைந்து சந்தேகநபரைத் தேடும் விசாரணையை ஆரம்பித்தனர். கடலை விற்பனையாளர் என்று சமூக ஊடகங்களில் தகவல் பரவிய நிலையில், பல இடங்களில் தேடுதல் நடத்தப்பட்டது.
கைது செய்யப்பட்டவர் 25 வயதுடைய ஒரு பிள்ளையின் தந்தை ஆவார். இவர் திருக்கோவில் மற்றும் அதைச் சுற்றியுள்ள பகுதிகளில் வாடகை அடிப்படையில் பல வீடுகளில் வசித்து வந்துள்ளார்.
குறித்த வீடியோ மற்றும் தகவல் பரவிய நிலையில், சந்தேகநபர் தான் தங்கியிருந்த இடத்திலிருந்து மூன்று நாட்களுக்கு முன்னர் தப்பிச் சென்றுள்ளார்.
கைது: திருக்கோவில் பொலிஸ் நிலைய பொறுப்பதிகாரி மற்றும் பொலிஸ் உத்தியோகத்தர்கள் அடங்கிய குழுவினர் இன்று மாலை கல்முனை, மருதமுனை பிரதேசத்தில் மேற்கொண்ட விசேட தேடுதல் நடவடிக்கையின்போது அவரைக் கைது செய்தனர்.
கைது செய்யப்படும் போது, அவர் தலையை மொட்டையடித்து தனது தோற்றத்தை மாற்றிக் கொண்டிருந்ததாகப் பொலிஸார் தெரிவித்தனர். மேலதிக விசாரணைகளுக்காகச் சந்தேகநபர் பொத்துவில் பொலிஸாரிடம் ஒப்படைக்கப்பட்டுள்ளார்.
இலங்கை உலகளவில் சுற்றுலாத் தலமாகப் புகழ் பெறுவதற்கு இங்குள்ள மக்களின் விருந்தோம்பல் காரணமாக இருந்தாலும், சில கட்டுப்பாடு இல்லாத நபர்கள் காரணமாக வெளிநாட்டுச் சுற்றுலாப் பயணிகள் இங்கு அசௌகரியங்களை எதிர்கொள்வது கவலைக்குரிய விடயமாகும்.
