பலாங்கொடை – பெலிஹுல்ஓயா பகுதியில், நிர்ணயிக்கப்பட்ட விலையை விட அதிக விலைக்குத் தண்ணீர் போத்தலை விற்பனை செய்த கடை உரிமையாளருக்கு, பலாங்கொடை நீதவான் நீதிமன்றம் பத்து இலட்சம் ரூபாய் (ரூ. 10,00,000) அபராதம் விதித்துள்ளது.
நுகர்வோர் அதிகாரசபை அதிகாரிகளால் (Consumer Affairs Authority – CAA) நேற்றைய முன்தினம் (டிசம்பர் 4) பலாங்கொடைப் பகுதியில் மேற்கொள்ளப்பட்ட சோதனையின் போது இந்த விதிமீறல் கண்டுபிடிக்கப்பட்டது.
கடை உரிமையாளர் ரூ. 100 இற்கு விற்பனை செய்ய வேண்டிய தண்ணீர் போத்தலை ரூ. 400 இற்கு விற்பனை செய்தமை உறுதிப்படுத்தப்பட்டது. இதனைத் தொடர்ந்து நுகர்வோர் அதிகாரசபை அதிகாரிகளால் அவர் கைது செய்யப்பட்டார்.
இந்த நிலையில், நேற்று (டிசம்பர் 5) குறித்த நபர் பலாங்கொடை நீதவான் நீதிமன்றில் முன்னிலைப்படுத்தப்பட்ட போதே, இந்த அதிக அபராதம் விதிக்கப்பட்டதாகத் தெரிவிக்கப்பட்டுள்ளது.
சீரற்ற காலநிலை மற்றும் அனர்த்த நிலைமைகள் நிலவும்போது அத்தியாவசியப் பொருட்களை அதிக விலைக்கு விற்பனை செய்யும் வியாபாரிகளுக்கு எதிராகக் கடுமையான சட்ட நடவடிக்கை எடுக்கப்படும் என்பதை இந்தத் தீர்ப்பு உறுதிப்படுத்துகிறது.
