விடுதலைப் புலிகளின் தலைவர் வேலுப்பிள்ளை பிரபாகரனின் தலைமைத்துவத்தில் இடம்பெற்ற விடுதலைப் போராட்டத்தை அழிப்பதற்கும், இன அழிப்பிற்கும் தத்துவார்த்த ரீதியாகச் செயற்பட்டவர்கள் மக்கள் விடுதலை முன்னணியினர் (JVP) என்று தமிழ் தேசிய மக்கள் முன்னணியின் தலைவரும் யாழ் மாவட்ட பாராளுமன்ற உறுப்பினருமான கஜேந்திரகுமார் பொன்னம்பலம் குற்றம் சாட்டியுள்ளார்.
பாராளுமன்றத்தில் இன்று (நவம்பர் 26) நடைபெற்ற வரவு செலவுத் திட்டத்தின் குழுநிலை விவாதத்தில் கலந்துகொண்டு உரையாற்றும்போதே அவர் இந்தக் கருத்துகளைத் தெரிவித்தார்.
மஹிந்த ராஜபக்ச தரப்பு இனவாதம் பேசியபோது தமிழினத்திற்கு எதிராக, தேசியத் தலைவரின் தலைமைத்துவத்தில் இடம்பெற்றிருந்த போராட்டத்தை அழிப்பதற்கும் இன அழிப்பிற்கும் தத்துவார்த்த ரீதியாக, தத்துவாசிரியர்களாக இருந்தவர்கள் இந்த ஜே.வி.பி.யினர்.
“தமிழ் தேச விரோத கொள்கைகளைக் கொண்ட இவர்கள் தற்போது தேசியத் தலைவரையும், மாவீரர்களையும் பற்றிப் பேசிக்கொண்டு வடக்கு மற்றும் கிழக்குக்குள் காலூன்ற முயற்சிக்கிறார்கள்.”
இதன் பிரதான செயற்பாட்டாளராக கடற்றொழில் அமைச்சர் சந்திரசேகர் (பொதுவாக மக்கள் விடுதலை முன்னணியுடன் தொடர்புடையவர் எனக் கருதப்படும் நபர்) செயற்படுகிறார் என்றும் அவர் குற்றம் சாட்டினார்.
ஜே.வி.பி.யின் தற்போதைய செயல்பாடுகளை இரட்டை வேடமாகக் கஜேந்திரகுமார் பொன்னம்பலம் சுட்டிக்காட்டினார். தேசியத் தலைவரின் தலைமைத்துவத்தின் கீழ் இயங்கிய போராளிகளுக்கு வடக்கு மற்றும் கிழக்கில் அஞ்சலி செலுத்துவதற்கும் மாவீரர் துயிலும் இல்லங்களை விடுவிப்பதற்கும் தாங்கள் நடவடிக்கை எடுக்கப்போவதாகத் தமிழ் மக்களுக்குக் காட்டிக்கொண்டு, தெற்கிலே அதற்கு நேர்மாறான கருத்துக்களைத் தெரிவித்துக்கொண்டிருக்கும் ஒரு சூழலே இன்று காணப்படுகிறது.
தியாக தீபம் திலீபனின் நினைவு நிகழ்விற்கு கடற்றொழில் அமைச்சர் நேரடியாகச் சென்றிருந்ததையும் அவர் குறிப்பிட்டுள்ளார். “தேசியத் தலைவரையும் அவருடைய மாவீரர்களையும் பற்றிப் பேசாது வடக்கு-கிழக்கிற்குள் நுழைய முடியாது. அப்படியானால் எந்தளவு தூரத்திற்குத் தமிழ் தேச விரோத தத்துவங்களைக்கொண்ட தரப்புகள் தோல்வியடைந்துள்ளன என்பதை இதன் மூலம் அறிந்து கொள்ள முடியும்” என்றும் அவர் தெரிவித்தார்.
ஈழத்தமிழ் தேசத்தினுடைய தலைவர் மட்டுமல்ல, உலகத் தமிழருடைய தலைவருமான பிரபாகரனின் 71 ஆவது பிறந்த தினம் இன்று (நவம்பர் 26) என்பதையும் அவர் சபையில் நினைவுபடுத்தினார்.
