இலங்கையின் பொதுப்போக்குவரத்து கட்டமைப்பில் நீண்டகாலமாகப் புறக்கணிக்கப்பட்டு வந்த விசேட தேவையுடையவர்கள் மற்றும் முதியோர்களின் நலனைக் கருத்திற்கொண்டு, 10 புதிய நவீன பேருந்துகளைச் சேவையில் ஈடுபடுத்த அரசாங்கம் தீர்மானித்துள்ளது. ‘கிளீன் ஸ்ரீலங்கா’ (Clean Sri Lanka) திட்டத்தின் கீழ் ஒதுக்கப்பட்டுள்ள நிதியைப் பயன்படுத்தி முன்னெடுக்கப்படும் இந்த முன்னோடித் திட்டத்தின் கீழ், நவீன வசதிகளுடன் கூடிய பேருந்துகள் கொள்வனவு செய்யப்பட்டுள்ளன. இந்தப் பேருந்துகள் எதிர்வரும் 15ஆம் திகதி நாட்டை வந்தடையவுள்ளதாகப் போக்குவரத்து அமைச்சின் தகவல்கள் தெரிவிக்கின்றன.
இந்தப் புதிய பேருந்துகளின் மிக முக்கிய அம்சமாக, விசேட தேவையுடையோர் மற்றும் முதியவர்கள் எவ்வித சிரமமுமின்றி ஏறி இறங்குவதற்கு ஏதுவாக ‘தாழ்வான மிதிபலகை’ (Low-floor) வசதி வடிவமைக்கப்பட்டுள்ளது. அத்துடன், முழுமையான குளிரூட்டப்பட்ட வசதி (Full AC), பயணிகளுக்கான டிஜிட்டல் தகவல் திரைகள் மற்றும் ஜி.பி.எஸ் (GPS) உட்கட்டமைப்பு வசதிகளும் இதில் உள்ளடக்கப்பட்டுள்ளன. நகர்ப்புற நெரிசலில் வசதியான மற்றும் கௌரவமான பயணத்தை உறுதிப்படுத்துவதே இந்தத் திட்டத்தின் பிரதான நோக்கமாகும்.
இருப்பினும், இவ்வளவு நவீன தொழில்நுட்பம் கொண்ட பேருந்துகளைப் பராமரிப்பதற்கோ அல்லது இயக்குவதற்கோ தேவையான பௌதீக மற்றும் டிஜிட்டல் உட்கட்டமைப்பு வசதிகள் தற்போதைய இலங்கை போக்குவரத்து சபையிடம் (SLTB) இல்லை என்பது கண்டறியப்பட்டுள்ளது. குறிப்பாக, இந்தப் பேருந்துகளுக்கான விசேட திருத்தப்பணிகள் மற்றும் மென்பொருள் மேலாண்மை ஆகியவற்றை மேற்கொள்வதில் அரச போக்குவரத்து சபை சவால்களை எதிர்கொண்டுள்ளது.
இந்தத் தொழில்நுட்பச் சிக்கலைத் தீர்க்கும் பொருட்டு, குறித்த 10 புதிய பேருந்துகளையும் இலங்கை போக்குவரத்து சபையின் கீழ் ஸ்தாபிக்கப்பட்ட ‘லங்கா மெட்ரோ ட்ரான்சிட்’ (Lanka Metro Transit) என்ற தனியார் நிறுவனத்திடம் ஒப்படைக்க அரசாங்கம் தீர்மானித்துள்ளது. இதன் மூலம் பேருந்துகள் முறையாகப் பராமரிக்கப்படுவதுடன், பயணிகளுக்குத் தடையற்ற சேவை வழங்கப்படும் என எதிர்பார்க்கப்படுகிறது. ஆரம்பகட்டமாக கொழும்பின் முக்கிய வீதிகளில் இந்தச் சேவை ஆரம்பிக்கப்படவுள்ளமை குறிப்பிடத்தக்கது.
