கடந்த நவம்பர் மாதம் ஏற்பட்ட புயல் அனர்த்தம் குறித்த எச்சரிக்கை பற்றி எதிர்க்கட்சியினர் நவம்பர் 12ஆம் திகதி முதலே அறிந்திருந்தும், அதனை அரசாங்கத்திற்குத் தெரிவிக்கத் தவறிவிட்டனர் எனக் குற்றம் சாட்டிய பிரதி அமைச்சர் மகிந்த ஜயசிங்க, அவர்கள் மீது வழக்குத் தொடர வேண்டும் என வலியுறுத்தியுள்ளார்.
ஊடகவியலாளர்களிடம் கருத்துத் தெரிவித்த பிரதி அமைச்சர் மகிந்த ஜயசிங்க, பின்வரும் முக்கிய விடயங்களைச் சுட்டிக்காட்டினார்.
புயல் வரவுள்ளதாக வளிமண்டலவியல் திணைக்களமோ அல்லது நீர்ப்பாசனத் திணைக்களமோ அரசாங்கத்திற்கு எவ்வித முன் அறிவிப்பையும் வழங்கவில்லை. எதிர்க்கட்சிகள் தாங்கள் கூறியது போல் எச்சரிக்கை குறித்து அறிந்திருந்தால், அரசாங்கத்தைப் போலவே மக்களால் தெரிவு செய்யப்பட்ட பிரதிநிதிகளான எதிர்க்கட்சிகளுக்கும் இதேபோன்ற பொறுப்பு உள்ளது.
ஐக்கிய மக்கள் சக்தி (SJB) மற்றும் ஸ்ரீலங்கா பொதுஜன பெரமுன (SLPP) போன்ற எதிர்க்கட்சிகள் கடந்த நவம்பர் 12 முதல் நவம்பர் 26 வரை 14 நாட்கள் பாராளுமன்றத்தில் வரவுசெலவுத் திட்ட விவாதத்தில் கலந்துகொண்டன.
“அவர்களில் எவரும் அதனைப் பாராளுமன்றத்தில் எழுப்பவில்லை. மாறாக, அனர்த்தம் ஏற்படும் வரை அதை இரகசியமாக வைத்திருந்தனர்.”
இத்தகைய அனர்த்தத்தைத் தடுக்கும் பொறுப்பு அரசாங்கத்திற்கு இருப்பது போலவே, எதிர்க்கட்சிக்கும் பொறுப்பு உள்ளது என்று குறிப்பிட்ட அவர், புயல் எச்சரிக்கை குறித்து அறிந்தும் மௌனம் காத்த எதிர்க்கட்சியினர் மீது வழக்குத் தொடர வேண்டும் என்று கடுமையாக வலியுறுத்தியுள்ளார்.
