விழிப்புலனற்றோர் அன்றாடம் எதிர்கொள்ளும் சவால்கள் குறித்து விழிப்புணர்வை ஏற்படுத்தும் விதமாக, நேற்று (நவம்பர் 11) கொழும்பு மாநகர முதல்வர் வ்ராய் கெலீ பல்தாஸார் (Vraîe Cally Balthazaar), கண்கள் கட்டப்பட்ட நிலையில் கொழும்பு நகரில் நடந்தார்.
பார்வை குறைபாடுடைய குழுவினருடன் இணைந்து கொழும்பைச் சுற்றி நடந்த மாநகர முதல்வர், பார்வை குறைபாடுடையவர்கள் நகரில் எதிர்கொள்ளும் நடைமுறைச் சிக்கல்களை நேரடியாக அனுபவித்து அறிந்துகொண்டார்.
கண் கட்டப்பட்ட நிலையில் இருந்த அவர், “பார்வை இல்லாமல் நகரில் நடப்பது எப்படி இருக்கும் என்பதைப் புரிந்துகொள்ளவே நான் கண் கட்டப்பட்டேன்” என்று தெரிவித்தார்.
இந்த விழிப்புணர்வு நடைப்பயணத்தில் இலங்கையின் முதலாவது விழிப்புலனற்ற நாடாளுமன்ற உறுப்பினர் சுகத் வசந்த டி சில்வாவும் கலந்துகொண்டார்.
கொழும்பு நகரை அனைவரும் இலகுவாகப் பயன்படுத்தக்கூடிய வகையில் மேம்படுத்துவது தொடர்பான சவால்களையும், விழிப்புலனற்ற சமூகத்தின் தேவைகளையும் புரிந்துகொள்ள இந்த முயற்சி உதவும் என்று எதிர்பார்க்கப்படுகிறது.
