ஏப்ரல் மாதத்திற்கான சமையல் எரிவாயு விலை திருத்தம் தொடர்பான இறுதித் தீர்மானம் எதிர்வரும் ஏப்ரல் 5 ஆம் திகதி வெளியிடப்படும் என லிட்ரோ (Litro Gas Lanka) நிறுவனம் அறிவித்துள்ளது. உலகச் சந்தையில் எரிவாயு விலையில் ஏற்பட்டுள்ள மாற்றங்களுக்கு அமைய, உள்நாட்டு விலைகளில் மேற்கொள்ளப்பட வேண்டிய திருத்தங்கள் குறித்த பரிந்துரைப் பட்டியல் ஏற்கனவே நிதி அமைச்சுக்கு சமர்ப்பிக்கப்பட்டுள்ளதாக லிட்ரோ நிறுவனத்தின் தலைவர் சன்ன குணவர்தன தெரிவித்துள்ளார்.
மத்திய கிழக்கு பிராந்தியத்தில் நிலவி வரும் பதற்றமான சூழ்நிலை காரணமாக உலகளாவிய எரிசக்தி சந்தையில் நிலவும் தளம்பல் நிலையை கருத்திற்கொண்டு இந்த விலை திருத்தம் அமையவுள்ளது. கடந்த மார்ச் 10 ஆம் திகதி நள்ளிரவு முதல் அமுலுக்கு வரும் வகையில், 12.5 கிலோ கிராம் எடையுள்ள லிட்ரோ எரிவாயு சிலிண்டரின் விலை 300 ரூபாவால் அதிகரிக்கப்பட்டு, அதன் தற்போதைய விலை 3,990 ரூபாவாகக் காணப்படுகிறது. நிதி அமைச்சின் முறையான அனுமதி கிடைத்தவுடன், புதிய விலைகள் பொதுமக்களுக்கு அறிவிக்கப்படும் எனத் தெரிவிக்கப்பட்டுள்ளது.
புதிய விலை திருத்தம் அறிவிக்கப்படும் வரை, தற்போது சந்தையில் உள்ள விலைகளிலேயே எரிவாயு விற்பனை செய்யப்படும் என லிட்ரோ தலைவர் உறுதிப்படுத்தியுள்ளார். இதன்படி, தற்போது 12.5 கிலோ கிராம் சிலிண்டர் 3,990 ரூபாவிற்கும், 5 கிலோ கிராம் சிலிண்டர் 1,602 ரூபாவிற்கும் மற்றும் 2.3 கிலோ கிராம் சிலிண்டர் 750 ரூபாவிற்கும் விற்பனை செய்யப்படுகின்றன. விலை திருத்தம் குறித்த அறிவிப்பு வரும் வரை நுகர்வோர் பழைய விலையிலேயே எரிவாயுவைப் பெற்றுக்கொள்ள முடியும்.
இதேவேளை, எதிர்வரும் சித்திரைப் புத்தாண்டு காலப்பகுதியில் நாட்டில் சமையல் எரிவாயு தட்டுப்பாடு ஏற்படாத வகையில் போதியளவு கையிருப்பு பேணப்பட்டு வருவதாகவும் லிட்ரோ நிறுவனம் தெரிவித்துள்ளது. பொதுமக்கள் எவ்வித அச்சமும் இன்றி தமக்குத் தேவையான எரிவாயுவைப் பெற்றுக்கொள்ள முடியும் எனவும், விநியோக நடவடிக்கைகள் வழமை போன்று தடையின்றி முன்னெடுக்கப்படும் எனவும் லிட்ரோ நிறுவனத்தின் தலைவர் சன்ன குணவர்தன மேலும் சுட்டிக்காட்டியுள்ளார்.
