யாழ்ப்பாணம் போதனா வைத்தியசாலையின் இரத்த வங்கியில் தற்போது அனைத்து வகைக் குருதிக்கும் கடும் தட்டுப்பாடு நிலவுவதாக இரத்த வங்கிப் பிரிவினர் கவலை வெளியிட்டுள்ளனர். சராசரியாக 330 பைந்துகள் (Pints) இருக்க வேண்டிய இரத்த வங்கியில், தற்போது மிகக் குறைந்த அளவிலான இரத்தமே கையிருப்பில் உள்ளதாகத் தெரிவிக்கப்படுகிறது. நாளாந்தம் நோயாளிகளுக்கு விநியோகிக்கப்படும் இரத்தத்தின் அளவு அதிகரித்து வரும் நிலையில், போதிய அளவு குருதியைப் பெற்றுக்கொள்ள முடியாத இக்கட்டான சூழல் உருவாகியுள்ளது.
தற்போது ஏனைய இரத்த வங்கிகளிடமிருந்தும் குருதியைப் பெற்று நோயாளிகளுக்கு விநியோகம் செய்யும் நிலைக்கு வைத்தியசாலை தள்ளப்பட்டுள்ளது. எனினும், அவர்களிடமும் கையிருப்பு குறைந்துள்ளதால், மாற்று வழிகள் இன்றி இரத்த வங்கி ஆபத்தான நிலையில் இருப்பதாக வைத்திய அதிகாரிகள் எச்சரித்துள்ளனர். வழக்கமாக வரும் கொடையாளர்களுக்குத் தொலைபேசி வாயிலாக அழைப்பு விடுத்த போதிலும், எதிர்பார்த்த எண்ணிக்கையிலான கொடையாளர்கள் முன்வரவில்லை என்பது பெரும் சவாலாக உள்ளது.
இந்த இக்கட்டான சூழலைத் தவிர்க்க, சனசமூக நிலையங்கள், விளையாட்டுக் கழகங்கள், பாடசாலைகள், பல்கலைக்கழகங்கள் மற்றும் பொது அமைப்புகள் இரத்ததான முகாம்களை ஏற்பாடு செய்யுமாறு வேண்டுகோள் விடுக்கப்பட்டுள்ளது. உங்கள் பகுதியில் முகாம்களை ஒழுங்கு செய்தால், வைத்தியசாலைக் குழுவினர் நேரடியாக வருகை தந்து குருதி சேகரிக்கும் பணியைச் செய்யத் தயாராக உள்ளனர். இது போன்ற தன்னார்வத் தொண்டு, பல உயிர்களைக் காக்க இன்றியமையாததாகக் கருதப்படுகிறது.
தனிநபர்கள் தங்களின் இரத்ததான பங்களிப்பை வழங்க விரும்பினால், தினமும் காலை 8.00 மணி முதல் மாலை 7.00 மணி வரை யாழ்ப்பாணம் போதனா வைத்தியசாலை இரத்த வங்கிக்கு நேரடியாக வருகை தந்து குருதிக் கொடை வழங்க முடியும். மேலும் விபரங்களுக்கு 021 222 3063 அல்லது 077 210 5375 ஆகிய தொலைபேசி இலக்கங்களுடன் தொடர்பு கொண்டு மேலதிக தகவல்களைப் பெற்றுக்கொள்ளலாம். உங்கள் சிறு துளி இரத்தம் ஒரு உயிர் காக்கும் என்பதால், பொதுமக்களை இவ்வுன்னத பணியில் இணைந்து கொள்ளுமாறு அன்புடன் அழைக்கிறோம்.
