எரிபொருள் விநியோகத்தில் நிலவும் சவால்களைத் தொழில்நுட்ப ரீதியாகத் தீர்க்கும் நோக்கில், யாழ்ப்பாணம் இந்துக் கல்லூரி உயர்தர மாணவர் ரமேஷநாதன் கருவூலனால் உருவாக்கப்பட்ட புதிய செயலி தொடர்பான விளக்கம் வடமாகாண ஆளுநர் நா.வேதநாயகனிடம் நேற்று (06.03.2026) சமர்ப்பிக்கப்பட்டது. எரிபொருள் விநியோகத்தை மிகவும் நேர்த்தியாகவும், வெளிப்படையாகவும் மாற்றுவதை இலக்காகக் கொண்டு ஆளுநரின் விசேட கோரிக்கைக்கு அமைய இந்தத் தொழில்நுட்பத் தீர்வு வடிவமைக்கப்பட்டுள்ளது. இச்செயலி எரிபொருள் விநியோகத்தை எளிமைப்படுத்த பல்வேறு நவீன வசதிகளை உள்ளடக்கியுள்ளது.
இந்தச் செயலி மூலம், பயனாளிகள் தங்களுக்கு ஒதுக்கப்பட்ட எரிபொருள் அளவு, பெற்றுக்கொண்ட விபரங்கள் மற்றும் எரிபொருள் நிரப்பு நிலையத்தின் இருப்பு ஆகியவற்றை நிகழ்நேரத்தில் (Real-time) அறிந்துகொள்ள முடியும். எரிபொருள் நிரப்பு நிலையங்களில் உள்ள கையிருப்பு விபரங்களை மக்கள் நேரடியாகத் தெரிந்துகொள்ள முடிவதால், நீண்ட வரிசைகளைத் தவிர்க்க முடியும் என்பதுடன், எரிபொருள் நிரப்பு நிலைய அலுவலர்கள் இலகுவாகத் தரவுகளைப் பதிவேற்றவும் முடியும். மேலும், பெற்றோலியக் கூட்டுத்தாபனம் வாகன வகை மற்றும் கையிருப்பிற்கேற்ப எரிபொருள் ஒதுக்கீடுகளை உடனுக்குடன் மாற்றியமைக்கக்கூடிய வசதியும் இதில் ஒருங்கிணைக்கப்பட்டுள்ளது.
டிஜிட்டல் முறைமையைப் பயன்படுத்தி எரிபொருளைப் பெற்றுக் கொள்ளும் வசதி இச்செயலியில் உள்வாங்கப்பட்டுள்ளது. இந்த நிகழ்வில் செயலியின் செயல்பாடுகள் குறித்து மாணவர் ரமேஷநாதன் கருவூலன் ஆளுநர் மற்றும் அதிகாரிகளுக்கு விரிவாக விளக்கமளித்தார். இச்செயலியைப் பொதுமக்கள் பயன்பாட்டிற்கு ஏற்றவாறு மேலும் மேம்படுத்துவது குறித்து ஆளுநர் கலந்தாலோசித்ததுடன், எதிர்காலத்தில் சில பிரதேசங்களில் எரிபொருள் தட்டுப்பாடு ஏற்படும் சூழலில் மக்கள் எவ்வித சிரமமுமின்றி எரிபொருளைப் பெற்றுக்கொள்ள இந்தத் தொழில்நுட்பம் ஒரு முக்கிய தீர்வாக அமையும் என நம்பிக்கை தெரிவித்தார்.
இந்தக் கலந்துரையாடலில் வடமாகாண ஆளுநரின் செயலாளர், யாழ்ப்பாணம் இந்துக் கல்லூரி அதிபர், இலங்கை பெற்றோலியக் கூட்டுத்தாபனத்தின் வட பிராந்திய முகாமையாளர் மற்றும் செயலியை உருவாக்கிய மாணவர் ஆகியோர் கலந்துகொண்டனர். மாணவரின் இந்தத் தொழில்நுட்பப் புத்தாக்கம், நாட்டின் எரிபொருள் விநியோகச் சங்கிலியில் டிஜிட்டல் மயமாக்கலை ஊக்குவிப்பதற்கான ஒரு முன்னோடி முயற்சியாகக் கருதப்படுகிறது. இத்தகைய தொழில்நுட்பத் தீர்வுகள் பொதுமக்களின் அத்தியாவசியத் தேவைகளைப் பூர்த்தி செய்வதில் காலத்தின் தேவையாக மாறியுள்ளன.
