மத்திய கிழக்கில் நிலவும் தீவிர போர்ச் சூழல் மற்றும் ஹோர்முஸ் நீரிணையில் வர்த்தகக் கப்பல்கள் மீது நடத்தப்படும் தொடர் தாக்குதல்கள், உலகளாவிய எரிசக்தி சந்தையில் பெரும் கொந்தளிப்பை ஏற்படுத்தியுள்ளன. ஹோர்முஸ் நீரிணை வழியாக இடம்பெறும் எண்ணெய் விநியோகம் முடங்கியுள்ளதால், மசகு எண்ணெயின் விலை பீப்பாய் ஒன்றுக்கு 200 அமெரிக்க டொலர்கள் வரை உயரக்கூடும் என ஈரானிய இராணுவ அதிகாரிகள் பகிரங்க எச்சரிக்கை விடுத்துள்ளனர். பிராந்திய பாதுகாப்பைச் சீர்குலைக்கும் அமெரிக்கா மற்றும் இஸ்ரேலின் நடவடிக்கைகளே இந்த எரிசக்தி நெருக்கடிக்குக் காரணம் என அவர்கள் குற்றம் சாட்டியுள்ளனர்.
இன்று (11) ஹோர்முஸ் நீரிணையில் இடம்பெற்ற தாக்குதல்களில், தாய்லாந்து நாட்டுக்குச் சொந்தமான ‘மேயுரி நரி’ (Mayuree Naree) உட்பட மூன்று சரக்குக் கப்பல்கள் ஏவுகணைத் தாக்குதலுக்கு உள்ளாகியுள்ளன. இந்தத் தாக்குதலில் பாதிக்கப்பட்ட ‘மேயுரி நரி’ கப்பலில் தீப்பிடித்ததுடன், அதன் பணியாளர்கள் பாதுகாப்பாக வெளியேற்றப்பட்டனர்; இருப்பினும், மூவர் காணாமல் போயுள்ளதாகத் தகவல்கள் தெரிவிக்கின்றன. ஈரானியப் புரட்சிகரப் பாதுகாப்புப் படையின் தாக்குதல்களைத் தொடர்ந்து, இப்பகுதி வழியாகச் செல்லும் கப்பல்களுக்குப் பாதுகாப்பு வழங்க அமெரிக்கா முயன்று வந்தாலும், தாக்குதல்களைத் தடுக்க முடியாத நிலை தொடர்கிறது.
ஈரானிய இராணுவ ஊடகப் பேச்சாளர் இப்ராஹிம் சோல்பகாரி, “எண்ணெய் விலை 200 டொலராக உயரத் தயாராகுங்கள், ஏனெனில் நீங்கள் சீர்குலைத்த பிராந்திய பாதுகாப்பிலேயே எண்ணெய் விலையும் தங்கியுள்ளது” என அமெரிக்காவிற்கு எச்சரிக்கை விடுத்துள்ளார். மேலும், ஈரானில் உள்ள வங்கியொன்றின் மீது நடத்தப்பட்ட தாக்குதலுக்குப் பதிலடியாக, அமெரிக்கா அல்லது இஸ்ரேலுடன் தொடர்புடைய வங்கிகள் மீது தாக்குதல் நடத்தப்படும் என அவர் தெரிவித்துள்ளதால், குறித்த பகுதிகளில் பொதுமக்கள் கவனமாக இருக்குமாறு அறிவுறுத்தப்பட்டுள்ளனர்.
உலகின் ஐந்தில் ஒரு பங்கு எண்ணெய் மற்றும் இயற்கை எரிவாயு விநியோக மையமான ஹோர்முஸ் நீரிணை முடங்கியுள்ளதால், 1970-களுக்குப் பிறகு உலகின் மிக மோசமான எரிசக்தி நெருக்கடி உருவாகியுள்ளது. இருப்பினும், இத்தகைய இக்கட்டான சூழலிலும் அமெரிக்க ஜனாதிபதி டொனால்ட் டிரம்ப் இப்போர்ச் சூழலுக்கு விரைவில் தீர்வு காண்பார் என்ற நம்பிக்கையில், பங்குச் சந்தைகள் ஓரளவு ஸ்திரத்தன்மையுடன் செயல்படுவதாக சர்வதேச செய்திகள் குறிப்பிடுகின்றன. பிராந்தியத்தில் பதற்றம் குறையாத வரையில், எரிசக்தி சந்தையில் நிலவும் இந்தத் தற்காலிக ஸ்திரத்தன்மை கேள்விக்குறியாகவே உள்ளது.
