மத்திய கிழக்கில் அமெரிக்கா மற்றும் இஸ்ரேலுக்கும் ஈரானுக்கும் இடையே நிலவும் போர்ச் சூழலை முடிவுக்குக் கொண்டுவருவதற்கு, ஈரானிய ஜனாதிபதி மசூத் பெசெஷ்கியான் மூன்று முக்கிய நிபந்தனைகளை விதித்துள்ளார். ரஷ்யா மற்றும் பாகிஸ்தான் நாட்டுத் தலைவர்களுடன் நடத்திய தொலைபேசி உரையாடல்களின் பின்னர், சமூக ஊடகத் தளமான ‘எக்ஸ்’ (X) வாயிலாக அவர் இந்த நிபந்தனைகளைத் தெளிவாக அறிவித்துள்ளார். இப்பிராந்தியத்தில் அமைதி மற்றும் ஸ்திரத்தன்மையை நிலைநாட்ட ஈரானிய அரசாங்கம் அர்ப்பணிப்புடன் உள்ளதாக அவர் இதன்போது வலியுறுத்தினார்.
ஈரானிய ஜனாதிபதி முன்வைத்துள்ள அந்த மூன்று நிபந்தனைகள் பின்வருமாறு: முதலாவதாக, ஈரானின் சட்டபூர்வமான உரிமைகளை சர்வதேச சமூகம் அங்கீகரிக்க வேண்டும். இரண்டாவதாக, போரினால் ஏற்பட்டுள்ள பாதிப்புகளுக்கு முறையான நட்டஈடு வழங்கப்பட வேண்டும். மூன்றாவதாக, எதிர்காலத்தில் ஈரான் மீது எந்தவிதமான ஆக்கிரமிப்புகளும் நடைபெறாது என்பதை உறுதிப்படுத்தும் வகையில் உறுதியான சர்வதேச உத்தரவாதங்களை வழங்க வேண்டும் என அவர் வலியுறுத்தியுள்ளார்.
இந்த மோதல் அமெரிக்கா மற்றும் இஸ்ரேலின் தூண்டுதலினாலேயே ஆரம்பமானதாகக் குற்றம் சாட்டியுள்ள ஜனாதிபதி பெசெஷ்கியான், தாங்கள் முன்வைத்துள்ள நிபந்தனைகளை வாஷிங்டன் மற்றும் டெல் அவிவ் அரசாங்கங்கள் ஏற்றுக்கொண்டால் மட்டுமே அமைதிப் பேச்சுவார்த்தைகள் சாத்தியப்படும் என்று தெரிவித்துள்ளார். போர் நிறுத்தத்தை மேற்கொள்வதற்கு தெளிவான உத்தரவாதங்கள் அவசியம் என்றும், வெறும் போர்நிறுத்தத்தை மட்டும் ஈரான் ஏற்காது என்றும் அவர் தனது நிலைப்பாட்டை உறுதிப்படுத்தியுள்ளார்.
தற்போது மூன்றாம் வாரத்தை எட்டியுள்ள இந்த மோதல் சூழலால், பிராந்தியத்தில் கடுமையான பாதிப்புகள் ஏற்பட்டுள்ள நிலையில், ஜனாதிபதியின் இந்த அறிவிப்பு முக்கியத்துவம் பெறுகிறது. இருப்பினும், அமெரிக்கா மற்றும் இஸ்ரேல் தரப்பிலிருந்து இந்த நிபந்தனைகள் குறித்த உடனடி எதிர்வினைகள் எதுவும் வெளியாகவில்லை. இப்பிராந்தியத்தில் போர் பதற்றத்தைத் தணிக்க சர்வதேச நாடுகளின் இராஜதந்திர முயற்சிகள் தீவிரமடைந்துள்ள போதிலும், ஈரானின் இந்த உறுதியான நிலைப்பாடு போரை முடிவுக்குக் கொண்டுவருவதில் ஒரு முக்கிய திருப்புமுனையாகப் பார்க்கப்படுகிறது.
