ஈரான் மற்றும் அமெரிக்கா – இஸ்ரேல் இடையிலான தற்போதைய போர்ச் சூழலில், ஈரான் எந்தவொரு போர்நிறுத்தத்தையோ அல்லது பேச்சுவார்த்தையையோ கோரவில்லை என ஈரானிய வெளியுறவு அமைச்சர் அப்பாஸ் அரக்சி (Abbas Araghchi) திட்டவட்டமாகத் தெரிவித்துள்ளார். அமெரிக்க ஜனாதிபதி டொனால்ட் ட்ரம்ப், ஈரான் ஒரு உடன்படிக்கைக்குத் தயாராக இருப்பதாகக் குறிப்பிட்டிருந்த கருத்தை முற்றாக மறுத்துள்ள அமைச்சர், “நாங்கள் ஒருபோதும் போர்நிறுத்தத்தையோ அல்லது பேச்சுவார்த்தையையோ கோரவில்லை” என்று CBS News உடனான நேர்காணலில் வலியுறுத்தினார்.
அமெரிக்காவுடன் பேச்சுவார்த்தை நடத்துவதற்கு எந்தவொரு காரணத்தையும் ஈரான் காணவில்லை எனத் தெரிவித்த அமைச்சர், கடந்த காலங்களில் இரு நாடுகளும் பேச்சுவார்த்தையில் ஈடுபட்டிருந்தபோது, அமெரிக்கா ஈரான் மீது தாக்குதல்களை முன்னெடுத்த கசப்பான அனுபவங்களைச் சுட்டிக்காட்டினார். “அமெரிக்கர்களுடன் பேசிக்கொண்டிருக்கும் போதே அவர்கள் எங்களைத் தாக்கத் தீர்மானித்தனர். எனவே, மீண்டும் அவர்களுடன் பேசுவதற்கு எவ்வித அவசியமும் இல்லை” என்று அவர் குறிப்பிட்டார்.
இது அமெரிக்கா மற்றும் ஜனாதிபதி டொனால்ட் ட்ரம்ப்பால் திட்டமிட்டுத் திணிக்கப்பட்ட ஒரு போர் என்று வர்ணித்துள்ள அமைச்சர் அரக்சி, தற்காப்பு நடவடிக்கைகளைத் தடையின்றித் தொடருவோம் என்று அறிவித்துள்ளார். “எதிர்தரப்பு இந்த போர் சட்டவிரோதமானது மற்றும் இதில் வெற்றி பெற முடியாது என்பதை உணரும் வரை, எமது மக்கள் மற்றும் நாட்டின் பாதுகாப்புக்காகத் தற்காப்பு நடவடிக்கைகளைத் தொடர்வோம்” என்று அவர் திட்டவட்டமாகக் கூறியுள்ளார்.
தற்போதைய போரில் ஈரானின் இராணுவ நடவடிக்கைகள் அமெரிக்க இராணுவ தளங்கள் மற்றும் சொத்துக்களை மட்டுமே இலக்காகக் கொண்டிருப்பதாகவும், பொதுமக்கள் இலக்குகள் மீது ஈரான் தாக்குதல் நடத்தவில்லை என்றும் அவர் விளக்கமளித்தார். ஈரானின் புதிய உச்ச தலைவர் மொஜ்தபா கமேனி நல்ல ஆரோக்கியத்துடன் இருப்பதாகவும், நாட்டின் நிலைமையை முழுமையாகக் கட்டுப்படுத்தி வருவதாகவும் அமைச்சர் உறுதிப்படுத்தியுள்ளார்.