உலகின் அதிக மக்கள்தொகை கொண்ட நாடான இந்தியாவில், ஒவ்வொரு தனிநபரையும் கணக்கெடுக்கும் பத்தாண்டுக்கு ஒருமுறை நடைபெறும் பாரிய பணி இன்று (ஏப்ரல் 1, 2026) உத்தியோகபூர்வமாகத் தொடங்கியுள்ளது. கோவிட்-19 பெருந்தொற்று காரணமாக 2021-ஆம் ஆண்டு நடைபெற வேண்டிய இக்கணக்கெடுப்பு தள்ளிப்போயிருந்த நிலையில், தற்போது சுமார் 30 இலட்சத்திற்கும் அதிகமான அரச அதிகாரிகள் ஒரு வருடகாலமாக இந்த மாபெரும் பணியில் ஈடுபடவுள்ளனர். முதன்முறையாக டிஜிட்டல் முறையில் முன்னெடுக்கப்படும் இக்கணக்கெடுப்பின் ஆரம்பக்கட்டமாக, இணையவழியில் விபரங்களைப் பதிய விரும்புவோருக்குக் குறுகிய கால அவகாசம் வழங்கப்பட்டுள்ளது.
மக்கள்தொகைக் கணக்கெடுப்பு ஆணையர் மிருதுஞ்சய் குமார் நாராயண் இது குறித்துத் தெரிவிக்கையில், இந்தக் கணக்கெடுப்பு இரண்டு முக்கிய கட்டங்களாக நடைபெறும் என்றார். முதற்கட்டத்தில் வீடுகள் மற்றும் அவற்றின் அடிப்படை வசதிகள் குறித்த விபரங்கள் பட்டியலிடப்படும். அதனைத் தொடர்ந்து இரண்டாம் கட்டத்தில், ஒவ்வொரு குடியிருப்பாளரின் பொருளாதார மற்றும் சமூக அளவுருக்கள் உள்ளிட்ட விரிவான விபரங்கள் வீடு வீடாகச் சென்று சேகரிக்கப்படும். 140 கோடிக்கும் அதிகமான மக்கள்தொகையைக் கொண்டு 2023-இல் சீனாவை விஞ்சிய இந்தியாவின் தற்போதைய துல்லியமான தரவுகளைப் பெறுவதே இதன் நோக்கமாகும்.
இந்தக் கணக்கெடுப்பின் மற்றுமொரு முக்கிய அம்சமாக, சாதி குறித்த விபரங்களும் சேகரிக்கப்படவுள்ளன. இந்தியாவின் சமூக மற்றும் அரசியல் கட்டமைப்பில் சாதி முக்கிய பங்கு வகிக்கும் நிலையில், 80 ஆண்டுகளுக்குப் பிறகு 2011-இல் எடுக்கப்பட்ட சாதி விபரங்கள் முழுமையாக வெளியிடப்படவில்லை. தற்போது முறையான தரவுகளைச் சேகரிப்பதன் மூலம், இடஒதுக்கீடு மற்றும் அரச உதவிகள் தேவைப்படும் சமூகங்களைச் சரியாக அடையாளம் காண முடியும் என ஆதரவாளர்கள் கருதுகின்றனர். இருப்பினும், வளர்ந்து வரும் ஒரு வல்லரசு நாட்டில் சாதி அடிப்படையிலான கணக்கெடுப்பு அவசியமற்றது என விமர்சகர்கள் சுட்டிக்காட்டுகின்றனர்.
பெரும்பான்மையான இளைஞர்களைக் கொண்ட இந்தியாவின் இந்த ‘மக்கள்தொகை சாதகத்தை’ (Demographic Dividend) முறையான திட்டமிடலுக்குப் பயன்படுத்த இத்தரவுகள் மிக அவசியமானவை எனப் பொருளாதார நிபுணர்கள் கருதுகின்றனர். பல வளர்ந்த நாடுகள் வயதான தொழிலாளர் சக்தியால் தடுமாறி வரும் வேளையில், இந்தியாவின் திறமையான இளைஞர் பட்டாளத்தைத் திட்டமிட இக்கணக்கெடுப்பு உதவும். 2027 மார்ச் மாதத்தில் நிறைவடையும் என எதிர்பார்க்கப்படும் இக்கணக்கெடுப்பின் முடிவுகள், டிஜிட்டல் முறையினால் மிக விரைவில் பொதுமக்களின் பார்வைக்கு வெளியிடப்படும் என அறிவிக்கப்பட்டுள்ளது.