மத்திய கிழக்கு பிராந்தியத்தில் நிலவி வரும் போர் பதற்றம் காரணமாக உலகளாவிய எரிசக்தி செலவுகள் அதிகரித்துள்ள நிலையில், இந்தியாவில் விமான எரிபொருள் (ATF) மற்றும் வர்த்தக ரீதியான சமையல் எரிவாயு (LPG) விலைகள் இன்று (ஏப்ரல் 01, 2026) புதன்கிழமை முதல் உயர்த்தப்பட்டுள்ளன. ஹோர்முஸ் ஜலசந்தி (Strait of Hormuz) ஊடான கப்பல் போக்குவரத்து முடங்கியுள்ளதால், உள்நாட்டு சந்தையில் விமான எரிபொருள் விலை 100 சதவீதத்திற்கும் மேலாக அதிகரிக்கும் என எதிர்பார்க்கப்பட்டது. இருப்பினும், விமான நிறுவனங்களையும் பயணிகளையும் பாதுகாக்கும் வகையில் இந்த விலை உயர்வை இந்திய எண்ணெய் அமைச்சகம் கட்டுப்படுத்தியுள்ளது.
தலைநகர் டெல்லியில் விமான டர்பைன் எரிபொருள் (ATF) விலை 8.5 சதவீதம் உயர்ந்துள்ளதாக இந்தியன் ஆயில் கார்ப்பரேஷன் (IOC) தெரிவித்துள்ளது. சர்வதேச சந்தையில் ஏற்பட்டுள்ள அதீத விலையேற்றத்திலிருந்து உள்நாட்டுப் பயணச் செலவுகளைப் பாதுகாக்கும் பொருட்டு, எதிர்பார்க்கப்பட்ட முழுமையான உயர்விற்குப் பதிலாக 25 சதவீதப் பகுதி உயர்வை மட்டுமே படிப்படியாக வழங்கியுள்ளதாகப் பெட்ரோலிய அமைச்சகம் விளக்கியுள்ளது. எனினும், சர்வதேச வழித்தடங்களில் பயணிக்கும் விமானங்களுக்கு உலகளாவிய சந்தை விலைக்கு நிகரான முழுமையான விலையேற்றம் அமுல்படுத்தப்படும் எனத் தெரிவிக்கப்பட்டுள்ளது.
விமான எரிபொருளுடன் சேர்த்து, 19 கிலோ எடை கொண்ட வர்த்தக ரீதியான எல்பிஜி (LPG) சிலிண்டர்களின் விலையும் கணிசமாக அதிகரித்துள்ளது. டெல்லி, மும்பை, கொல்கத்தா மற்றும் சென்னை ஆகிய முக்கிய நகரங்களில் ஒரு சிலிண்டரின் விலை சராசரியாக 200 ரூபாய் வரை உயர்த்தப்பட்டுள்ளது. திரவமாக்கப்பட்ட இயற்கை எரிவாயுவை (LNG) இறக்குமதி செய்வதில் உலகின் நான்காவது பெரிய நாடாகவும், சமையல் எரிவாயு இறக்குமதியில் இரண்டாவது பெரிய நாடாகவும் உள்ள இந்தியா, தனது தேவைகளுக்குப் பெருமளவில் மத்திய கிழக்கு நாடுகளையே சார்ந்துள்ளதால் இந்த விலை உயர்வு தவிர்க்க முடியாததாகியுள்ளது.
இந்த விலை உயர்வு உணவகங்கள் மற்றும் வர்த்தக நிறுவனங்களைப் பாதிக்கும் என்ற போதிலும், சாதாரண பொதுமக்களைப் பாதிக்கும் வீட்டு உபயோகத்திற்கான சமையல் எரிவாயு சிலிண்டர்களின் விலையில் எவ்வித மாற்றமும் செய்யப்படவில்லை என்பது குறிப்பிடத்தக்கது. விமான எரிபொருள் விலையேற்றம் காரணமாக வரும் நாட்களில் விமானக் கட்டணங்கள் அதிகரிக்கக்கூடும் என அஞ்சப்படுகிறது. சர்வதேச எரிசக்தி சந்தையில் நிலவும் அசாதாரண சூழ்நிலைகளை மத்திய அரசாங்கம் தொடர்ந்து கண்காணித்து வருவதாக எண்ணெய் அமைச்சகம் மேலும் குறிப்பிட்டுள்ளது.
