இலங்கையின் 78 ஆவது சுதந்திர தின நிகழ்வுகளில் இராணுவ அணிவகுப்புகள் மற்றும் வர்ணனைகள் கையாளப்பட்ட விதம் குறித்து முன்னாள் அமைச்சர் சரத் வீரசேகர கடும் அதிருப்தியை வெளியிட்டுள்ளார். இன்றைய அரசு புலம்பெயர் தமிழ் அமைப்புகளைத் திருப்திப்படுத்தவே இவ்வாறான ‘மென்மையான’ போக்கைக் கடைப்பிடிப்பதாக அவர் குற்றம் சாட்டினார்.
1948 இல் சுதந்திரம் கிடைத்திருந்தாலும், 2009 ஆம் ஆண்டு பயங்கரவாதம் தோற்கடிக்கப்பட்ட போதே நாட்டுக்கு உண்மையான சுதந்திரம் கிடைத்தது என அவர் சுட்டிக்காட்டினார்.
சுதந்திர தின அணிவகுப்பின் போது, இலங்கை இராணுவத்தின் விசேட மற்றும் கொமாண்டோ படையினரை வர்ணித்தவர், அவர்கள் பயங்கரவாதத்தை ஒழித்தவர்கள் என்று குறிப்பிடவில்லை. மாறாக, ‘டித்வா சூறாவளியில்’ மக்களைப் பாதுகாத்தவர்கள் என்றே குறிப்பிட்டார். இது இராணுவத்தின் தியாகத்தைக் கொச்சைப்படுத்தும் செயல் என அவர் சாடினார்.
2009 இறுதிப் போரில் முக்கிய பங்காற்றிய கனரக வாகனங்கள் மற்றும் ‘மல்டி பெரல்’ (Multi-barrel) ஏவுகணைத் தளபாடங்கள் இம்முறை வாகனத் தொடரணியில் சேர்க்கப்படவில்லை. இது அரசாங்கத்தின் முதுகெலும்பில்லாத செயலாகும் என அவர் தெரிவித்தார்.
இந்தச் சுதந்திர தின விழா தேசியத்தைக் கொண்டாடுவதற்காக நடத்தப்படவில்லை எனத் தெரிவித்த சரத் வீரசேகர, தமிழ் பிரிவினைவாதிகளையும் புலம்பெயர் தமிழர்களையும் சந்தோஷப்படுத்துவதற்காகவே அரசாங்கம் அவர்களின் ‘மனம் நோகாதபடி’ நடந்துகொள்வதாகக் காரசாரமாகத் தெரிவித்தார். இலங்கையின் எந்தவொரு முந்தைய அரசாங்கமும் இவ்வளவு பலவீனமாகச் செயல்பட்டதில்லை என்றும் அவர் தனது உரையில் குறிப்பிட்டார்.
