வட மாகாணத்தில் உள்ள அனைத்து வீதிகளையும் எதிர்வரும் இரண்டு முதல் மூன்று ஆண்டுகளுக்குள் புனரமைத்து, போக்குவரத்து உட்கட்டமைப்பை முழுமையாகச் சீரமைக்கத் திட்டமிட்டுள்ளதாக வடக்கு மாகாண ஆளுநர் நாகலிங்கம் வேதநாயகன் தெரிவித்துள்ளார். ‘வளமான நாடு – அழகான வாழ்க்கை’ எனும் தொனிப்பொருளின் கீழ், யாழ். மாவட்டத்தில் 117.04 மில்லியன் ரூபாய் செலவில் காரைநகர் சுற்றுவட்ட வீதியின் புனரமைப்புப் பணிகளை நேற்று (15) ஆரம்பித்து வைத்து உரையாற்றும் போதே அவர் இதனைத் தெரிவித்தார்.
கடந்த 40 ஆண்டுகளாகப் புனரமைக்கப்படாமல் இருந்த காரைநகர் சுற்றுவட்ட வீதிக்கு, தற்போதைய அரசாங்கம் விடிவு பெற்றுத்தந்திருப்பதாக ஆளுநர் குறிப்பிட்டார். நீண்டகாலமாகப் பழுதடைந்த நிலையில் இருந்த இந்த வீதியால், இப்பகுதி மக்கள் மிகுந்த சிரமங்களை எதிர்நோக்கி வந்தனர். குறிப்பாக, சுற்றுலாத்துறைக்கு முக்கியத்துவம் வாய்ந்த காரைநகர் பிரதேசம், வீதியின் மோசமான நிலையால் சுற்றுலாப் பயணிகளின் வருகையில் பெரும் சரிவைச் சந்தித்திருந்தது.
இந்த வீதி புனரமைப்புப் பணிகளின் ஊடாக, இப்பகுதியின் சுற்றுலாத்துறை மீண்டும் உயிர் பெறும் என்று அவர் நம்பிக்கை வெளியிட்டார். தரமான சாலை வசதிகள் சுற்றுலாப் பயணிகளின் வருகையை அதிகரிக்கும் என்பதால், உள்ளூர் பொருளாதார வளர்ச்சிக்கும், தொழில்வாய்ப்பு உருவாக்கத்திற்கும் இது வலுசேர்க்கும் என எதிர்பார்க்கப்படுகிறது.
வட மாகாணத்தின் அனைத்துப் பகுதிகளையும் இணைக்கும் வகையில் வீதி அபிவிருத்தித் திட்டங்களைத் திட்டமிட்டு முன்னெடுக்க ஆளுநர் பணிப்புரை விடுத்துள்ளார். மக்களின் அடிப்படைத் தேவைகளை நிறைவேற்றுவதுடன், பிராந்தியத்தின் சமூக-பொருளாதார மேம்பாட்டிற்கு முன்னுரிமை அளித்து இந்தப் பணிகள் துரிதமாக மேற்கொள்ளப்படும் எனவும் அவர் உறுதியளித்தார்.
