பல்வேறு தீர்க்கப்படாத கோரிக்கைகளை முன்வைத்து, நாடு முழுவதுமுள்ள எரிபொருள் நிலைய உரிமையாளர்கள் நாளை (ஏப்ரல் 06, 2026) காலை 9:30 மணிக்கு கொழும்பு, இலங்கை கனிம எண்ணெய் கூட்டுத்தாபன (CPC) தலைமையகத்திற்கு முன்பாக பாரிய அமைதிப் போராட்டமொன்றை முன்னெடுக்கவுள்ளனர். பெட்ரோலிய விநியோகஸ்தர்கள் சங்கம் (PDA) இந்தத் தீர்மானத்தை அறிவித்துள்ளதுடன், இந்த போராட்டத்தினால் நாளை நாடு தழுவிய ரீதியில் எரிபொருள் விநியோக நடவடிக்கைகளில் பாதிப்புகள் ஏற்படக்கூடும் என அஞ்சப்படுகிறது.
தற்போதைய ‘ஒற்றை-இரட்டை’ (Odd-Even) இலக்க எரிபொருள் விநியோக முறையினால் தங்களது ஊழியர்கள் பெரும் சிரமங்களை எதிர்கொள்வதாகச் சங்கத்தின் செயற்குழு உறுப்பினர் டி.வி. சாந்த சில்வா குற்றம் சுமத்தியுள்ளார். இந்த முறையினால் வாடிக்கையாளர்களுக்கும் ஊழியர்களுக்கும் இடையே தேவையற்ற முரண்பாடுகள் ஏற்படுவதுடன், விநியோகத் துறையின் சீரான இயக்கம் பாதிக்கப்பட்டுள்ளதாகவும் அவர் சுட்டிக்காட்டினார். வளைகுடா போர்ச் சூழலால் எரிபொருள் தட்டுப்பாடு நிலவும் வேளையில், இவ்வாறான கட்டுப்பாடுகள் நடைமுறைச் சிக்கல்களை உருவாக்குவதாக உரிமையாளர்கள் தெரிவிக்கின்றனர்.
முக்கியமாக, எரிபொருள் நிலையங்களுக்கான இலாபப் பங்கு விவகாரத்தில் பாரிய அநீதி இழைக்கப்பட்டுள்ளதாக சங்கம் சுட்டிக்காட்டியுள்ளது. முன்னைய விலை சூத்திரத்தின்படி கூட்டுத்தாபனங்களுக்கு 6 சதவீத இயக்க இலாபமும், எரிபொருள் நிலையங்களுக்கு 3 சதவீத இலாபப் பங்கும் வழங்கப்பட்டு வந்தது. ஆனால், கனிம எண்ணெய் கூட்டுத்தாபனத்தின் புதிய நிர்வாகத்தினால் தங்களுக்கு வழங்கப்பட்டு வந்த அந்த 3 சதவீத இலாபப் பங்கு தற்போது நீக்கப்பட்டுள்ளதாக டி.வி. சாந்த சில்வா வேதனை தெரிவித்துள்ளார். இது நிலையங்களின் பராமரிப்புச் செலவுகளை ஈடுகட்ட முடியாமல் உரிமையாளர்களை முடக்கியுள்ளது.
மேலும், டீசல் மற்றும் பெட்ரோல் விநியோகத்தில் நிலவும் தொடர்ச்சியான தாமதங்கள் மற்றும் விநியோகத் தோல்விகளால் (Supply Failures) எரிபொருள் நிலையங்களை முறையாக இயக்க முடியாமல் உரிமையாளர்கள் திணறி வருகின்றனர். இந்த விவகாரங்கள் நாடு தழுவிய ரீதியில் எரிபொருள் நிலையங்களின் நிதி நிலைப்புத்தன்மையைக் கடுமையாகப் பாதித்துள்ளதாக எச்சரித்துள்ள சங்கம், அரசாங்கம் உடனடியாகத் தலையிட்டு இந்தப் பிரச்சினைகளுக்குத் தீர்வு காண வேண்டும் என வலியுறுத்தியுள்ளது. நாளை நடைபெறும் இந்தப் போராட்டத்தின் முடிவைப் பொறுத்தே அடுத்தகட்ட நடவடிக்கைகள் அமையும் என எதிர்பார்க்கப்படுகிறது.